राजविराज– सप्तरीको एक गाउमा १४ वर्षीया बालिकामाथि आफ्नै गाउँका २१ वर्षीय युवकले विवाहको प्रलोभन देखाएर बलात्कार गरेको आरोप लागेको छ। पीडित बालिकाका अनुसार युवक झापाको विर्तामोडमा मजदुरी गर्छन।

बालिका एक वर्षदेखि आरोपीसँग सम्बन्धमा थिइन्। युवकले ‘बिहे गर्छु’ भन्दै निरन्तर आफुलाई शारीरिक शोषण गरेको बालिकाले आरोप लगाएकी छिन्। कानुनअनुसार नाबालिगको सहमति अमान्य हुने भएकाले यो घटना बलात्कारको स्पष्ट केसमा पर्छ।

घटना थाहा पाएपछि बालिकाका बुवाले बुधबार जिल्ला प्रहरी कार्यालय सप्तरीको महिला, बालबालिका तथा ज्येष्ठ नागरिक सेवा केन्द्रमा उजुरी दिएका थिए। तर परिवारले प्रहरीको कदमप्रति चित्त वुझाएको छैन। उजुरी बलात्कारको विषयमा नभई ‘कुटपिट’ शीर्षकमा दर्ता गरिएको जनाईएको छ।

सप्तरीका डीएसपी डम्बरबहादुर पुरीले ‘बालिकाका बुवाले कुटपिटसम्बन्धी उजुरी दिएको’ बताएका छन्। परिवारले भने उजुरीमा स्पष्ट रूपमा बलात्कारको विषय उल्लेख भएको तर प्रहरीले त्यसमा ध्यान नदिएको बताएको छ।

बालिकाका बुवाका अनुसार युवकले अन्तिम पटक उनलाई भारदह बोलाएर पाँच सय रुपैयाँ दिएर जन्मदर्ता ल्याउ अनि विवाह गर्छु’ भन्दै फकाएका थिए। त्यसपछि युवक सम्पर्कविहीन बनेको जनाईएको छ। युवक सम्पर्कविहिन भएपछि मात्रै बालिकाले घटनाबारे खुलासा गरेकी थिइन्। परिवार निरक्षर र साधारण कृषक भएकाले जटिल कानुनी प्रकृयामा फसेका छन्।

यसैबीच गाउँमा पञ्जायती (छलफल) बसेर पनि घट्नालाई मिलापत्र गर्न दबाब दिईएको खुलेको छ। ‘अब मेरी छोरीसँग कस्ले विवाह गर्छ ? उसको जीवन बर्बाद गर्ने व्यक्तिलाई कानूनअनुसार कारबाही गर्नुपर्छ।’– बालिकाका बुवाले भने।

प्रहरी चौकी रम्पुरा मल्हनियाँको व्यवहार पनि विवादास्पद देखिएको छ। परिवारले उजुरी दिन गएपछि प्रहरी अधिकारीहरूले ‘पीडक र उसको बुवालाई आइतबार बोलाउँछौँ’ भन्दै फर्काइदिएको गुनासो गरेका छन्। यसले नाबालिगमाथि भएको यौन हिंसाको विषयमा प्रहरी गम्भिर नभएको संकेत दिएको छ।

वडाध्यक्षले भने घटनाबारे सामाजिक सञ्जालमार्फत मात्र थाहा पाएको र थप बुझ्ने काम गरिरहेको जानकारी दिएका छन्। स्थानीयका अनुसार, विवाहको प्रलोभन देखाएर नाबालिगमाथि यौन शोषण गर्ने प्रवृत्ति ग्रामीण क्षेत्रमा वढ्दै गएको छ। यसलाई कानुनले बलात्कारको श्रेणीमा राखेको छ।