काठमाडौँको जडिबुटीमा रोकिराखेको बसमा ठोक्किँदा स्कुटरमा सवार दुई जनाको मृत्यु
शीर्ष खबर 
राजधानी— काठमाडौँको जडिबुटीस्थित आकाशे पुल नजिक शुक्रबार बिहान भएको दुर्घटनामा स्कुटरमा सवार दुई युवाको मृत्यु भएको छ।
जिल्ला प्रहरी परिसर काठमाडौंका प्रवक्ता एसपी अपिल बोहराका अनुसार बिहान करिव पौने ३ बजे कोटेश्वरबाट जडिबुटीतर्फ आउँदै गरेको लु ४३ प ४९३८ नम्बरको स्कुटर सडकछेउमा रोकिराखेको बा प्र ०१–००६ ख ४२४३ नम्बरको अरनिको यातायातको बसको पछाडिको भागमा ठोक्किएको थियो।
ठक्करपछि गम्भीर घाइते भएका स्कुटर चालक र पछाडि सवार दुवैलाई तत्काल ट्रमा सेन्टर पु¥याइएको थियो। तर उपचारका क्रममा दुवैको मृत्यु भएको प्रहरीले जनाएको छ।
मृत्यु हुनेमा नवलपरासी सुनौल–१ स्थायी घर भई हाल भक्तपुरको लोकन्थली बस्ने २२ वर्षीय शिरिस पौडेल र काभ्रेपलाञ्चोक पाँचखाल–२ होस्के स्थायी घर भएका २३ वर्षीय नितेश नेपाल छन्। डाक्टरले पौडेललाई बिहान साढे ३ बजे र नेपाललाई बिहान पौने ४ बजे मृत घोषणा गरेका थिए।
बस चालक दोलखाको भिमेश्वर नगरपालिका–७ घर भई हाल काडाँघारी बस्ने २५ वर्षीय सुभाष तामाङलाई प्रहरीले नियन्त्रणमा लिएको छ। घटनाबारे थप अनुसन्धान भइरहेको प्रहरीले जनाएको छ।
