काठमाडौँ— जेनजी आन्दोलनमा सक्रिय युवाहरुबीच आन्तरिक तनाव फेरि सतहमा आएको छ। गत मंसिर ८ गते दिउँसो युवा तथा खेलकुद मन्त्रालयभित्रै ‘काउन्सिल अफ जेनजी’का मधेश प्रदेश संयोजक शिव यादव र जनकपुरका जेनजी युवा जितेन्द्रकुमार महतोबीच लफडा भएको छ।

मन्त्री बब्लु गुप्ताकै अगाडि तीव्र वादविवाद भएको भिडियो बाहिरिएपछि विवाद थप चर्किएको छ। मन्त्री गुप्ताले दुवै पक्षलाई तत्कालै थामथुम पारेर स्थिति नियन्त्रणमा ल्याएका थिए। महतो नेतृत्वको टोली प्रधानमन्त्री सुशीला कार्कीलाई भेट्न नपाएपछि आक्रोशित हुँदै मन्त्रालयमा पुगेको थियो। आफूले शान्त हुन आग्रह गर्दा सामान्य भनाभन मात्रै भएको उनले बताए।

त्यसैबीच उनिहरुको विवाद भएको जनाईएको छ। यादवले भने आक्रोशित समुहलाई शान्त हुन आग्रह गर्दा भनाभन भएको वताए। ‘फरक विचार बोकेका युवाबीच असहमति त भइहाल्छ। तर, मिडियामा आएजस्तो हात हालाहाल चाहिँ बिलकुलै होइन।’– उनले भने।

महतोले पनि कुटाकुट भएको दाबी अस्वीकार गर्दै शिव यादवले आफ्नो टोलीका जेनजी युवालाई होच्याएको आरोप लगाए। ‘हामीबीच केही भनाभन भयो, त्यति मात्रै,’ महतोले भने, ‘यादवले भाइहरूलाई तुच्छ देखाउन खोजेपछि मैले आपत्ति जनाएँ।’

महतोको दाबी अनुसार उनीहरूको टोली सिंहदरबार पुगेको मुख्य कारण भनेको ‘जेनजीका माग किन पूरा हुँदैनन?’ भन्ने जवाफ माग्नु थियो। वर्तमान सरकार विदेशीको दबाबमा चलेको र जेनजीले उठाएका मुद्दा बेवास्ता गरेको उनको आरोप छ। ‘यो सरकारले पुराना दललाई पुनर्जीवन दिनुबाहेक केही गरेको छैन,’ उनले भने, ‘जेनजीको एक पनि माग पूरा गरेन।’

महतोले आफूलाई पनि मन्त्री बन्न प्रस्ताव आएको भए पनि अस्वीकार गरेको विवादास्पद दाबी गरेका छन्। उनका अनुसार वन तथा वातावरण वा कृषि तथा पशुपक्षी मन्त्रालयको नेतृत्व गर्न आग्रह गरिएको थियो। ‘प्रधानमन्त्रीकै सचिवालय र सुधन गुरुङले रिक्वेस्ट गरेका थिए,’ महतोले भने, ‘तर, म यस्तो सरकारमा जान चाहिँनँ।’

सुधन गुरुङको समूहमा नरहेको बताउने महतोले आफू कुनै गुट–उपगुटको राजनीति नगर्ने दाबी गरे। अहिले देखिएका जेनजीका विभिन्न शक्तिकेन्द्रहरू ‘सत्ता भागबन्डा’का लागि बनेको टिप्पणी गर्दै उनले अब मिराज ढुंगानाको समूहसँग मिलेर काम गर्ने वताए।

महतोका अनुसार प्रत्यक्ष कार्यकारी निर्वाचित प्रधानमन्त्री, २०४५ सालदेखि यताको सम्पत्ति शुद्धीकरण र संविधान संशोधन जेनजीको साझा एजेन्डा हो। ‘अब मिराज ढुंगानासँग मिलेर ठूलो आन्दोलन सुरु हुन्छ,’ उनले भने।

जेनजी भित्रका द्वन्द्व, मन्त्रीसमक्षनै देखिएको आन्तरिक तनाव र नेतृत्वका समूहगत दाबी दाबीले जेनजी आन्दोलन कुन दिशामा जाँदैछ भन्नेबारे फेरि प्रश्न उठाएको छ।