सुदूरपश्चिमको कैलालीमा शुक्रबार साँझ भएको भीषण मोटरसाइकल दुर्घटनाले तीन युवाको ज्यान लिएको छ भने एक जना गम्भीर घाइते अवस्थामा जीवनका लागि संघर्ष गरिरहेका छन्।

धनगढी–डडेल्धुरा (भीमदत्त) राजमार्गअन्तर्गत अत्तरियास्थित वनदेवी सडकखण्डमा दुई मोटरसाइकल ठोक्किँदा भएको दुर्घटनाले केही क्षणमै तीन परिवारलाई शोकमा डुबाएको हो। प्रहरीका अनुसार सुपप्र ०१००९ प ७७८१ र सुपप्र ०१००१ प ३१८७ नम्बरका मोटरसाइकल तिब्र गतिमा गुडिरहेका बेला एक्कासि आपसमा ठोक्किएका थिए।

दुर्घटनाको प्रभाव यति भयावह थियो कि मोटरसाइकलका पाङ्ग्रा र पाटपुर्जा सडकभरि छरपस्ट भएका थिए। प्रारम्भिक अनुसन्धानले प्रतिघण्टा सय किलोमिटरभन्दा बढी गतिमा सवारी चलाइएको हुनसक्ने संकेत गरेको छ, जसले दुर्घटनाको गम्भीरता अझ स्पष्ट बनाएको छ।

दुर्घटनामा धनगढी उपमहानगरपालिका–२ का २२ वर्षीय हरिश ओलीको मृत्यु भएको पुष्टि भएको छ। उनी दुर्घटना हुँदा चलाइरहेको मोटरसाइकलमै सवार थिए र उपचारका लागि लैजाँदै गर्दा बाटोमै ज्यान गुमाउनुपरेको प्रहरीले जनाएको छ।

सोही मोटरसाइकलको पछाडि सवार गोदावरी नगरपालिका–६ लालपुरका २३ वर्षीय जीवन पाठक गम्भीर घाइते भएका छन्। उनको अहिले धनगढीस्थित मायाँ मेट्रो हस्पिटलमा उपचार भइरहेको छ र अवस्था जटिल रहेको चिकित्सकहरूले बताएका छन्।

अर्को मोटरसाइकलमा सवार गोदावरी नगरपालिका–१ का अन्दाजी २६ वर्षीय योगेन्द्र शाह र पछाडि बसेका अन्दाजी २३ वर्षीय हरिश पार्कीको पनि उपचारका लागि लैजाँदै गर्दा मृत्यु भएको प्रहरीले जनाएको छ।

शाह यसअघि पनि दुई पटक मोटरसाइकल दुर्घटनामा परी घाइते भइसकेको तथ्य प्रहरीले उल्लेख गरेको छ। प्रहरीका अनुसार मृतक हरिश ओली विवाह कार्यक्रममा सहभागी भएर धनगढीतर्फ फर्किने क्रममा दुर्घटनामा परेका थिए।

इलाका प्रहरी कार्यालय मालाखेती, अत्तरियाका अनुसार दुर्घटनाको वास्तविक कारण पत्ता लगाउन विस्तृत अनुसन्धान जारी छ।