पोखरा— शनिबार कास्कीको पोखरामा आयोजित उम्मेदवार–संवाद कार्यक्रम राष्ट्रिय स्वतन्त्र पार्टीका सभापति रवि लामिछानेका कारण तीव्र जनआक्रोशको रंगमञ्च बनेको छ। कार्यक्रम सुरु हुँदा सामान्य राजनीतिक छलफलको अपेक्षा गरिएको थियो, तर केहीबेरमै सहकारी बचतकर्ताको पीडा र आक्रोशले वातावरण तातिएको थियो।

सहकारी ठगी प्रकरणको आरोपले पहिलेदेखि नै राजनीतिक बहसको केन्द्रमा रहेका रवि लामिछानेको नाम वहसमा आएपछि एकाएक वातावरण उग्र वनेको थियो। सूर्यदर्शन सहकारीका बचतकर्ता कृष्णप्रसाद जैसी मञ्चतिर उभिँदा कार्यक्रमको दिशा नै फेरियो। उनले कास्की निर्वाचन क्षेत्र नम्बर ३ की रास्वपा उम्मेदवार बिना गुरुङ समक्ष आफ्ना छोराको विद्यालयको ८० हजार रुपैयाँको बिल थमाए।

त्यो कागजको बिल केवल आर्थिक हिसाबको कागज थिएन, बरु सहकारीमा राखेको बचत डुबेको परिवारको पीडा र असन्तोषको प्रतीकजस्तै देखिन्थ्यो। जैसीले सहकारीमा राखेको पैसा हिनामिना भएपछि परिवार आर्थिक संकटमा पुगेको र आफ्नो छोराले वार्षिक परीक्षा नै दिन नपाउने अवस्था आएको दुःख व्यक्त गरे।

सभाहलमा केही क्षण स्तब्धता छायो, किनकि त्यहाँ उपस्थित धेरैलाई यो दृश्य केवल राजनीतिक कार्यक्रम नभई पीडितको प्रत्यक्ष पुकार जस्तो लागिरहेको थियो। जैसीको आक्रोशको केन्द्र भने पार्टी नेतृत्व थियो। उनले सहकारीको रकम फिर्ता नपाउँदा परिवारको भविष्य नै अन्योलमा परेको बताए।

यही विषयलाई लिएर सहभागीहरूले रवि लामिछाने माथि गम्भीर प्रश्न उठाए। कार्यक्रममा उपस्थित मतदाताहरूले सहकारी ठगी प्रकरणको छायाँ चुनावी मैदानसम्म आइपुगेको भन्दै तीव्र असन्तोष प्रकट गरे।

उम्मेदवार गुरुङ भने प्रश्नहरूको चापमा निकै असहज देखिइन्। उनीसँग पार्टी नेतृत्वबारे उठेका प्रश्नहरूको स्पष्ट जवाफ अपेक्षा गरिएको थियो, तर उनले प्रत्यक्ष बचाउ वा स्पष्टिकरण दिन सकिनन्। बरु, उनले जैसीले दिएको बिल पार्टी सभापतिसम्म पुर्‍याउने प्रतिबद्धता जनाइन्।

संवादका क्रममा उनको प्रस्तुति फितलो देखिएको भन्दै धेरै सहभागीहरूले आलोचना गरेका थिए। उनले आफूभन्दा अग्रज नेताहरूको उपस्थितिमा बोल्न गाह्रो भएको उल्लेख गर्दै आफ्नो क्षमता प्रश्न गर्न नहुने तर्क राखे पनि त्यसले उपस्थित भीडको असन्तोष शान्त पार्न सकेन।

कार्यक्रमको अर्को विवादास्पद पक्ष भने उम्मेदवारीको प्रक्रिया नै बन्यो। संवादकै क्रममा गुरुङले टिकट पाउन ६० लाख रुपैयाँ दिएको आरोपसमेत उठाइयो, जसले हलभित्र थप सनसनी फैलायो। यद्यपि उनले यसबारे स्पष्ट प्रतिक्रिया दिइनन्। पार्टीभित्रै पनि उनको उम्मेदवारीलाई लिएर असन्तोष रहेको चर्चा कार्यक्रममा बारम्बार उठिरहेको थियो।

कास्की–३ क्षेत्रलाई यदुनाथ अधिकारीको प्रभाव क्षेत्र मानिने भए पनि अन्तिम समयमा गुरुङ उम्मेदवार बनेपछि स्थानीय तहमा पार्टीभित्र गुटवन्दी भएको असन्तुष्टि बढेको भनाइहरू कार्यक्रममै सुनिन्थे।

यो घटना केवल एक उम्मेदवारमाथिको असहज प्रश्नोत्तरमा सीमित रहेन। यसले सहकारी ठगी प्रकरणले नेपाली राजनीतिमा कति गहिरो असर पारेको छ भन्ने पनि उजागर गर्‍यो। पोखराको उक्त संवाद कार्यक्रम चुनावी अभियानभन्दा बढी आक्रोश र अविश्वासको प्रत्यक्ष अभिव्यक्तिमा परिणत भयो, जहाँ मतदाताले आफ्नो बचत डुबेको पीडालाई राजनीतिक नेतृत्वसामु राखे।

घटनाले अर्को महत्वपूर्ण प्रश्न पनि उठाएको छ—सहकारी ठगीको आरोप झेलिरहेको नेतृत्वको छायाँमा चुनावी मैदानमा उत्रिएका उम्मेदवारहरूले मतदाताको विश्वास कसरी जित्ने? पोखरामा देखिएको दृश्यले संकेत गरेको छ– आर्थिक पीडितहरूको आक्रोश अब केवल अदालत वा सडकमा सीमित छैन, त्यो सिधै चुनावी सभासम्म आइपुगेको छ। जहाँ जनताको विश्वास गुमेपछि राजनीतिक नारा र भाषणहरू कमजोर देखिन थाल्छन्।