हात जोडेर ‘श्रीमान म भाग्दिन, अर्को जिल्ला जाँदा पनि बरु अनुमति लिउँला’ भन्दा पनि रवि लामिछाने छुटेनन्
शीर्ष खबर 
पोखरा– राष्ट्रिय स्वतन्त्र पार्टी (रास्वपा) सभापति रवि लामिछानेलाई अनुसन्धानका लागि थप १५ दिन हिरासतमा राख्न कास्की जिल्ला अदालतले प्रहरीलाई अनुमति दिएको छ।
न्यायाधीश भीमलाल बेलबासेको इजलासमा करिव डेढ घण्टाको बहसपछि रविलाई अझै १५ दिन हिरासतमै राखेर अनुसन्धान गर्न अनुमति दिईएको हो।
बहसका क्रममा लामिछानेले आफूलाई थुनाबाहिर राखेर अनुसन्धान गर्न माग गरेका थिए। उनले न्यायाधीश हिमलाल बेल्बासेसँग ‘श्रीमान् एउटा बिन्ती बिसाउन चाहन्छु’ भन्दै समय मागेका थिए। इजलासले संक्षिप्त कुरा राख्न भनेपछि उनले दुई हात जोड्दै आफु भागेर कतै पनि नजाने भन्दै रिहा गर्न आग्रह गरे।
लामिछानेको भनाई उद्धृत गर्दै ती अधिवक्ताले भने, ‘श्रीमान्, मैले शुरुका दिनदेखि नै भन्दै आइरहेको छु कि म अदालतलाई सहयोग गर्छु भनेर। म यो देश छाडेर अन्त कहाँ जाउँला र? न म कहिँकतै भाग्ने अवस्था छ। एक जिल्लाबाट अर्को जिल्ला जान परे पनि बरु म अनुमति लिएरै हिँडुला। तर, बिन्ती श्रीमान्! म एउटा पार्टीको सभापति हुँ। मैले गर्नुपर्ने कामहरु बाहिर धेरै छन्। मलाई छाड्न आदेश दिइयोस्।’
न्यायाधीश बेल्बासेले भने चितवन लगायत अन्य जिल्ला अदालतबाट पनि पक्राउ पुर्जी जारी भएको स्मरण गराउँदै रवि लामिछानेलाई अरु १५ दिन हिरासतमै वस्न सुझाव दिए। ‘तपाईविरुद्ध अन्य कुन–कुन जिल्ला अदालतले पक्राउ पुर्जी दिएका छन्, बिर्सनुभयो ? छुटेको पाँच मीनेटमा फेरि पक्राउ पर्नुहुन्छ’ भन्दै न्यायाधीशले जवाफ दिएको ति अधिवक्ताले जनाए।
लामिछानेले त्यसपछि पनि केही कुरा भन्न खोज्दै थिए। तर, न्यायाधीश बेल्बासेले थप १५ दिन हिरासतमा राखेर अनुसन्धान गर्न प्रहरीले अनुमति पाएको आदेश सुनाएका थिए।
इजलासले कास्की प्रहरीको मागअनुसार नै अनुशन्धानका लागि म्याद थपेको हो। पक्राउ परेका केही प्रतिवादीहरूको हकमा बयान कार्य बाँकी रहेको, बयान गरेका प्रतिवादीको हकमा थप प्रमाण खुली आएको तथ्यमा पूरक बयान बाँकी रहेको, हस्ताक्षर परीक्षण गर्न पठाएकोमा प्रतिवेदन प्राप्त हुन बाँकी रहेको र प्रतिवादीहरूको कारोबार रहेको घरजग्गा खरिद बिक्रीको लिखत प्रमाण प्राप्त हुन बाँकी रहेकाले म्याद थपिएको जनाएको छ।
पछिल्लोपटक गत २५ कात्तिकमा थपिएको १३ दिनको म्याद सकिएपछि प्रहरीले लामिछानेलाई आज पाँचै पटक अदालतमा उपस्थित गराएको हो। सहकारी ठगी प्रकरणमा अनुसन्धानका लागि उनी २ कात्तिकमा काठमाडौंबाट पक्राउ परेका हुन।
उनीमाथि सहकारी ठगीसँगै संगठित अपराध र सम्पत्ति शुद्धीकरण मुद्दामा पनि अनुसन्धान भइरहेको छ। पोखराको सूर्यदर्शन सहकारीको रकम काठमाडौंस्थित गोर्खा मिडिया प्रालिमा प्रयोग गरेर अपचलन गरेको आरोप लामिछाने माथि छ।
सूर्यदर्शन सहकारीबाट करिब ५ करोड रुपैयाँ गोर्खा मिडियामा गएको भन्दै मिडियाका अध्यक्ष जीबी राई, तत्कालीन प्रबन्धक रवि लामिछाने, सञ्चालक छविलाल जोशी, कुमार रम्तेल लगायत विरुद्ध उजुरी परेको छ।
एमाले नेता सुर्य थापा नेतृत्वको संसदीय छानबिन विशेष समितिले पनि उनीहरुलाई दोषी देखाउँदै थप अनुसन्धानका लागि सिफारिस गरेको थियो। समितिको सिफारिस लगत्तै रवि र छविलाई नियन्त्रणमा लिएर प्रहरीले अनुसन्धान गरिरहेको छ भने जीबी फरार छन्।
चितवनको सहारा सहकारीको रकम पनि गोर्खा मिडियामा प्रयोग गरेर अपचलन गरेको आरोप रवि लामिछानेलाई छ। जिल्ला अदालत चितवनले ७ मंसिरमा रविसहित १० जना विरुद्ध पक्राउ पुर्जी जारी गरेको छ।
