बारा– बारामा दुई मोटरसाइकल आपसमा ठोकिँदा दुई जनाको मृत्यु भएको छ भने एक जना गम्भीर घाइते भएका छन्।

जिल्ला प्रहरी कार्यालय बाराका डीएसपी विजयराज पण्डितका अनुसार आइतबार दिउँसो वीरगञ्ज–पथलैया सडकखण्डमा दुर्घटना भएको हो। सिमराबाट पथलैया तर्फ गइरहेको बा ९० प्र ६७९४ नम्बरको मोटरसाइकल र विपरीत दिशाबाट आउँदै गरेको बा ०६–००३ प्र १७५३ नम्बरको मोटरसाइकल एकआपसमा ठोकिँदा दुर्घटना भएको उनले बताए।

दुर्घटनामा सप्तरीको विष्णुपुर नगरपालिका–७ का २८ वर्षीय महेश पण्डित र रौतहटको गुजरा गाउँपालिका–७ परसवाका २५ वर्षीय रोशन चौधरी घाइते भएका थिए। दुबैजनाको उपचारको क्रममा मृत्यु भएको प्रहरीको भनाइ छ।

पण्डितको परवानीपुरस्थित एलएस न्युरो अस्पतालमा र चौधरीको प्रादेशिक अस्पताल कलैयामा मृत्यु भएको हो। मोटरसाइकलमा सवार ऐश्वर्य चोक निवासी ३४ वर्षीय भूपेन्द्र चौधरी गम्भीर घाइते भएका छन्। उनको उपचार एलएस अस्पतालमा भइरहेको प्रहरीले जनाएको छ।

प्रहरीले घटनाबारे थप अनुसन्धान भइरहेको जनाएको छ।