काठमाडौँ– सरकारी ठेक्का अलपत्र पारेर सार्वजनिक परियोजनाहरूलाई लामो समयदेखि अन्यौलमा धकेलेको आरोप लाग्दै आएको निर्माण व्यवसायी समूह ‘शर्मा एण्ड कम्पनी’का अध्यक्ष रमेश शर्मा पक्राउ परेका छन्। निर्माण क्षेत्रमै प्रभावशाली मानिने शर्मालाई आज काठमाडौँ उपत्यका अपराध अनुसन्धान कार्यालयको टोलीले पक्राउ गरी हिरासतमा लिएको हो।

प्रहरीका अनुसार शहरी विकास मन्त्रालयबाट प्राप्त औपचारिक पत्राचारका आधारमा उनीमाथि कारबाही अघि बढाइएको हो। कार्यालयका एसएसपी सन्तोष खड्काका अनुसार लामो समयदेखि विभिन्न सरकारी ठेक्काहरू समयमा सम्पन्न नगरी अलपत्र छोड्ने र त्यसबाट राज्यलाई आर्थिक तथा संरचनात्मक क्षति पु¥याउने आरोपमा अनुसन्धान तीव्र बनाइएको थियो। सोही क्रममा संकलित प्रमाणका आधारमा शर्मालाई पक्राउ गरिएको जनाइएको छ।

निर्माण व्यवसायी क्षेत्रमा ‘शर्मा एण्ड कम्पनी’को नाम ठूला परियोजनासँग जोडिँदै आएको भए पनि पछिल्लो समय सो कम्पनीले लिएका धेरै ठेक्का समयमै सम्पन्न नगरेको, काम अधुरै छोडेको र बारम्बार म्याद थप्दै आएको आरोप सार्वजनिक रूपमा उठ्दै आएको थियो। यसले विकास आयोजनाहरूमा ढिलासुस्ती, लागत वृद्धि र सेवाग्राहीमा प्रत्यक्ष असर परेको भन्दै सरोकारवालाहरूले कडा कारबाहीको माग गर्दै आएका थिए।

पक्राउसँगै अब अनुसन्धानले ठेक्का व्यवस्थापनभित्रको सम्भावित सेटिङ, प्रभाव र कमजोरीहरूलाई उजागर गर्ने अपेक्षा गरिएको छ। सरकारी निकायसँगको समन्वय, ठेक्का प्रक्रिया र कार्यान्वयनको पारदर्शितामाथि समेत यस प्रकरणले नयाँ बहस सिर्जना गर्ने देखिएको छ।

हाल शर्मामाथि थप अनुसन्धान प्रक्रिया अघि बढाइएको प्रहरीले जनाएको छ। यस घटनाले सार्वजनिक निर्माण क्षेत्रमा उत्तरदायित्व र जवाफदेहिताको प्रश्नलाई पुनः केन्द्रमा ल्याएको छ, जहाँ ठेक्का लिने मात्र होइन, समयमै सम्पन्न गर्ने जिम्मेवारी पनि उत्तिकै महत्वपूर्ण हुने सन्देश स्पष्ट रूपमा देखिएको छ।