काठमाडौँ— प्यूठानको स्वर्गद्वारी नगरपालिकाका उपप्रमुख मीनराज रानामगरको शनिबार साँझ जिप दुर्घटनामा मृत्यु भएको छ। आफैंले चलाइरहेको नगरपालिकाको बोलेरो पिकअप जिप सडकबाट करिब ५०० मिटर तल खस्दा उनको घटनास्थलमै मृत्यु भएको प्रहरीले जनाएको छ।

जिल्ला प्रहरी कार्यालय प्यूठानका अनुसार स्वर्गद्वारी–२ बाङ्गेसल्लास्थित सडकखण्डमा स्वर्गद्वारीबाट धनवाङतर्फ जाँदै गरेको लुम्बिनी प्रदेश ०१–००१ झ ०००८ नम्बरको जिप दुर्घटनामा परेको हो। दुर्घटना शनिबार अपराह्न करिब पौने ५ बजे भएको बताइएको छ।

दुर्घटनाका बेला ५० वर्षीय रानामगर जिपमा एक्लै सवार थिए। प्रारम्भिक विवरणअनुसार जिप अनियन्त्रित भई सडकबाट तल खसेको थियो। दुर्घटनापछि गाडी भिरमा अड्किएको अवस्थामा फेला परेको प्रहरीले जनाएको छ।

घटनाको प्रारम्भिक चरणमा उपप्रमुख रानामगर गम्भीर घाइते भएको सूचना सार्वजनिक भएको थियो। त्यसलगत्तै प्रहरी टोली घटनास्थल पुगेर उद्धार तथा आवश्यक प्रक्रिया अघि बढाएको थियो। पछि उनको मृत्यु भएको पुष्टि भएको हो।

जिल्ला प्रहरी कार्यालय प्यूठानले दुर्घटनाको कारणबारे अनुसन्धान भइरहेको जनाएको छ। सडकको अवस्था, सवारीको प्राविधिक पक्ष तथा अन्य सम्भावित कारणबारे प्रहरीले आवश्यक अनुसन्धान गरिरहेको छ।

रानामगर स्वर्गद्वारी नगरपालिकाका निर्वाचित उपप्रमुख हुन्। उनको निधनसँगै स्थानीय तह र जिल्लाको राजनीतिक तथा सामाजिक क्षेत्रमा शोक छाएको छ।