काठमाण्डौं– कोशी प्रदेशका पूर्वमन्त्री एवम नेकपा एमालेका नेता बुद्धिकुमार राजभण्डारी जुवाको खालबाट पक्राउ परेका छन्। प्रदेशसभा सदस्यसमेत रहेका भण्डारीलाई शनिबार राती काठमाण्डौंको सिनामंगलस्थित एक होटलबाट पक्राउ गरिएको हो।

सोलुखुम्बुका राजभण्डारी सत्तारुढ नेकपा (एमाले)बाट प्रदेशसभा सदस्यमा निर्वाचित भएका थिए। प्रदेशसभाको अघिल्लो कार्यकालमा एमाले कोशी प्रदेशका प्रमुख सचेतक थिए।

महानगरीय प्रहरी वृत्त गौशालाको टोलीले राजभण्डारीसहित ११ जनालाई पक्रााउ गरेको छ। जसमा एमालेका सोलुखुम्बु जिल्ला कमिटी सदस्य तथा सोताङ गाउँपालिकाका पूर्वअध्यक्ष बीरबहादुर राई, कलाकार पुरुषोत्तम शर्मा, उत्तमकुमार राई, अनिश तामाङ, दीपक खड्का, भीमबहादुर साम्बाहाङ्फे, रवि श्रेष्ठ र राजु महत छन्।

पक्राउ पर्ने शर्मा (टेलिसिरियल ‘सक्किगो’नि) कलाकार हुन्। काठमाण्डौं प्रहरीका एसपी नवराज अधिकारीका अनुसार महानगरीय प्रहरी वृत्त गौशालाको टोलीले होटलमा छापा मारेर उनीहरुलाई पक्राउ गरेको हो। जुवा खालबाट प्रहरीले १ लाख नगदसमेत नियन्त्रणमा लिएको छ।