काठमाडौँ– काठमाडौँ र धादिङको सिमानामा पर्ने धादिङको धुनिबेसी नगरपालिका–९, झ्याप्लेखोलामा ३५ जनाको ज्यान जाने गरी भएको त्रासदीपूर्ण दुर्घटनामा त्यहाँका सीडीओ र एसपीको गम्भिर लापर्वाही पनि एउटा कारण भएको निस्कर्ष गृहमन्त्रालयले निकालेको छ।

मन्त्रालयका अधिकारीहरुका अनुसार, धादिङ, सिन्धुपाल्चोक, काभ्रे जस्ता जिल्लाहरु सधैं विपद्जन्य घटनाबाट जोखिममा हुने जिल्ला हुन। यी जिल्लाका सीडीओ सधैं ‘स्ट्याण्ड बाइ’ रहनुपर्छ। त्यसमाथि मन्त्रालयले भारी वर्षाको सम्भावना रहेको भन्दै १० साउनमै जिल्ला प्रशासन कार्यालयहरुलाई रात्रीकालीन गाडी चल्न नदिन निर्देशन दिएको थियो।

निर्देशन अनुसार काठमाडौँ र चितवनमा प्रहरीले शुक्रबार राति नै गाडी चलाउन रोक लगायो। तर चितवनबाट ७ बजे अगाडि नै छुटेका गाडीहरु धादिङमा भने निर्वाध चले। यद्यपी, भारी वर्षाका कारण ठाउँठाउँमा खसेको पहिरोले शुक्रबार मध्यरातदेखि नै पृथ्वी राजमार्ग अवरुद्ध भइसकेको थियो।

धादिङबाट काठमाडौं प्रवेश गर्ने विन्दु नजिकै रहेको झ्याप्ले खोलामा पनि यही नियती देखियो। अगाडि पहिरो खसेर रोकिएका गाडीमाथि पहाडै खसेर पुर्यो। स्थानीय प्रशासनको चरम लापर्वाहीका कारण दुर्घटनाको जानकारी पनि समयमा हुन सकेन। त्यसैले थप मद्दत टोली पठाउने कुरा पनि कल्पना भन्दा वाहिरको कुरा भयो।

यो सवै परिस्थिती हेर्दा पूर्वसतर्कतामा जिल्ला प्रशासनको भूमिका शून्य जस्तै देखिएको छ। धादिङका तत्कालिन सीडीओ राजेन्द्रदेव पाण्डे र प्रहरी प्रमुख एसपी गौतम केसीको तिक्ततापूर्ण सम्वन्धको असर झ्याप्ले खोलाको दुर्घटनामा देखिएको छ। मन्त्रालय स्रोतका अनुसार सीडीओ र एसपीबीच राम्रो सम्बन्ध नभएको पाईएको छ।

सीडीओले सबै सुरक्षा निकायलाई मिलाएर लैजानुपर्नेमा सीडीओ र एसपीबीच बोलचालै नहुने जस्तो स्थिति पाईएको मन्त्रालय श्रोत वताउँछ। यही सम्वन्धका कारण गृह सचिवलाई समेत घट्नाको जानकारी पुगीसक्दा अन्य निकायले सीडीओलाई भने झ्याप्लेखोलाको परिस्थिति स्पष्ट जानकारी नै नगराएको पाईएको छ।

गृह सचिव गोकर्णमणि दुवाडी आफैं धादिङका निवासी हुन। स्थानीयले दुवाडीलाई दिएको जानकारी अनुसार अप्ठ्यारो पर्दा सीडीओले फोन समेत नउठाउने गरेको पाईएको छ। त्यही कारण मन्त्रालयले धादिङका सीडीओ पाण्डेलाई हटाएर सहसचिव सुमन घिमिरेलाई पठाएको छ।

प्रहरी प्रधान कार्यालय, नक्सालले धादिङका एसपी गौतम केसीलाई पनि जिम्मेवारीबाट हटाएको छ। उनको ठाउँमा एसपी दीपेन्द्र शाही गएका छन्। गृहमन्त्री रमेश लेखकले संसद्को राज्य व्यवस्था तथा सुशासन समितिमा एड्भाइजरी जारी भएका बेला समेत राति गाडी कसरी झ्याप्ले खोला पुग्यो भन्ने विषयमा आन्तरिक छानबिन भइरहेको बताएका छन्।