वीरगन्ज — वीरगन्ज महानगरपालिका–२८ बगहीमा शुक्रबार दिउँसो ट्याक्टर दुर्घटना हुँदा दुई किशोरले ज्यान गुमाएका छन्। बगही गाउँका १७ वर्षीय आकाश पटेल र १७ वर्षकै गोलु पटेलको मृत्यु भएको हो।

दुर्घटनामा इनर्वा गाउँका अन्दाजी १८–१९ वर्षका जयकुमार मण्डल घाइते भएका छन्। वडाध्यक्ष सुर्युग महतो धानुकका अनुसार शुक्रबार दिउँसो करिब २ बजे भेडाहा खोलाबाट माटो लिएर बगहीतर्फ जाँदै गरेको ट्याक्टर अनियन्त्रित भई सडकबाट करिब १५ फिट तल खसेको थियो।

ट्याक्टर पल्टिँदा चालक आकाश र गोलुको च्यापिएर घटनास्थलमै मृत्यु भएको जिल्ला प्रहरी कार्यालय पर्साका डीएसपी सुवास भट्टले जानकारी दिए। घाइते जयकुमारको वीरगन्जमा उपचार भइरहेको छ।

मृतक दुवै जनाको शव पोस्टमार्टमका लागि नारायणी अस्पताल पठाएको छ।