आशिका तामाङसहित दुईजनालाई ५ दिन कैदको सजाय, सफाई पाएको आशिकाको दावी
शीर्ष खबर 
राजधानी — जिल्ला अदालत भक्तपुरले आपराधिक उपद्रव मुद्दामा दोषी ठहर गर्दै आफूलाई सामाजिक अभियन्ता बताउने आशिका तामाङसहित दुईजनालाई पाँच/पाँच दिन कैद सजाय सुनाएको छ। अर्का प्रतिवादी शरण तिरूवाला हुन।
जिल्ला अदालतकी सूचना अधिकारी हिराकुमारी भण्डारीले अदालतले फैसला सुनाउँदै प्रतिवादीहरूलाई ५ सय रुपैयाँ जरिवाना तिर्नुपर्ने, दामासाहीले पीडितलाई ८ हजार ३ सय रुपैयाँ क्षतिपूर्ति दिनुपर्ने र पीडित राहत कोषमा जनही २ सय रुपैयाँ भराउने आदेश दिएको जानकारी दिइन्।
मुद्दा सूर्यविनायक नगरपालिकास्थित साँगामा बनाइएको झोलुङ्गे पुलको शुल्क उठाउने क्रममा उठेको विवादसँग सम्बन्धित छ। प्रतिवादीहरूले पुल पार गर्न शुल्क लिइरहेका कर्मचारीलाई अवरोध पुर्याएको, सूचना च्यातेको र नगरपालिकाको कार्यमा बाधा पुर्याएको भन्दै जाहेरी परेको थियो। नगरपालिकाले प्रहरीमा आपराधिक उपद्रवको जाहेरी दायर गरेको थियो।
सोही मुद्दामा अदालतले कैदसहित सजाय सुनाए पनि आशिकाले भने सामाजिक सञ्जालमार्फत आफुले सफाइ पाएको दावी गरेकी छन्। उनले फेसबुकमा लेखेकी छिन्, ‘भक्तपुर जिल्ला अदालतले साँगामा अवस्थित झोलुङ्गे पुल पार गर्दा २० रुपैयाँको विरोध गरेको मामलामा मलाई न्यायाधीशले सफाइ दिनु भएको छ।’
