विराटनगर— कुवेतको चर्चित मदिरा काण्डका कारण धनकुटाको महालक्ष्मी नगरपालिका–१ कटहरेका तीन बालिका अभिभावकविहीन बनेका छन्।

वैदेशिक रोजगारीको सिलसिलामा करिब दुई वर्षअघि कुवेत पुगेका ४३ वर्षीय डम्बर मगरको करिब १० दिनअघि विषाक्त मदिरा सेवनका कारण मृत्यु भएको थिए। पतिको निधनको खबर सुनेर बेहोस भएकी श्रीमती ३४ वर्षीया विद्या मगरको निधन भएपछि उनीहरुका ३ छोरीको विचल्ली भएको छ।

उनीहरुका छोरीहरु १७ वर्षीया विपना मगर र १६ वर्षीया सञ्जु मगर विद्यालयमा अध्ययनरत छन् भने कान्छी दुई वर्षीया संयुक्ताको हेरचाहका लागि तत्काल अभिभावक आवश्यक छ। मृतकका भाइ तथा वडासदस्य घनेन्द्र मगरका अनुसार अभिभावकविहीन भएका छोरीहरूको लालनपालन र शिक्षामा गम्भीर संकट उत्पन्न भएको छ।

हाल जेठी र माइली छोरी धार्मिक परम्परा अनुसार किरियापुत्री बसेका छन्। डम्बर मगरको शव अझै कुवेतमै रहेको र नेपाल ल्याउन प्रक्रिया चलिरहेको वडासदस्य मगरले बताए। स्थानीय वडाध्यक्ष टेकबहादुर गुरुङका अनुसार दम्पत्तिको असामयिक निधनपछि छोरीहरूको पुनःस्थापनाका लागि स्थानीय स्तरमै पहल थालिएको छ।

माइली छोरीको नाममा बैंक खाता खोलेर सहयोग संकलन अभियान सुरु गरिएको उनले जानकारी दिए। कुवेतमा विषाक्त मदिरा सेवनबाट २२ भन्दा बढी नेपालीको मृत्यु भइसकेको छ भने कैयौं उपचाररत छन्। यस घटनाले वैदेशिक रोजगारीमा रहेका नेपालीको असुरक्षा र परिवारको पीडा अझै उजागर गरेको छ।