राजविराज– संघीय मामिला तथा सामान्य प्रशासन मन्त्रालयले बिहीबार एकै पटक २१९ उपसचिव र शाखा अधिकृतको सरुवा गरेको छ। यससँगै देशभरका स्थानीय तहमा लामो समयदेखि जारी ‘निमित्त प्रमुख प्रशासकीय अधिकृत’ को व्यवस्था अन्त्य भएको सरकारी दाबी छ।

यो सरुवाले सप्तरी जिल्लामा पनि प्रत्यक्ष प्रभाव पारेको छ। मन्त्रालयले जारी गरेको सूचीअनुसार कञ्चनरुप नगरपालिकामा अनुज भण्डारी (उपसचिव)र डाक्नेश्वरी नगरपालिकामा केशव प्रसाद रिजाल (उपसचिव) प्रमुख प्रशासकीय अधिकृतमा खटाईएका छन्।

सप्तरीका नगरपालिकाहरू लामो समयदेखि ‘निमित्त’को भरमा चलेका थिए। यसले नीति निर्माणदेखि वित्तीय निर्णयसम्म अनिश्चितता ल्याउने गरेको स्थानीय तहहरूले गुनासो गर्दै आएका थिए।

अब प्रशासनिक कामकाज सहज र स्थायित्वसहित अघि बढ्ने, नीतिगत तथा वित्तीय निर्णयमा अधिकार र जवाफदेही स्पष्ट हुने, स्थानीय तहमा ‘निमित्त’ संस्कृतिको अन्त्य हुने अपेक्षा गरिएको छ।

मन्त्रालयका अनुसार हिजो मात्र १२२ जना उपसचिव र ९७ जना शाखा अधिकृतलाई सरुवा गरिएको हो। जस मध्ये १०५ वटा नगरपालिकामा उपसचिव पठाइएको छ भने ८६ वटा गाउँपालिकामा शाखा अधिकृत खटाइएको छ।

यद्यपि सहसचिव पद भने अझै अभावग्रस्त छ। ६ महानगरमध्ये ५ मा मात्रै सहसचिव छन्, १ महानगर खाली छ। ११ उपमहानगरमध्ये २ मा मात्र सहसचिव छन्, बाँकी ९ वटामा पद रिक्त छ। यसरी, कुल १० वटा स्थानीय तहमा सहसचिव पद अझै खाली रहेको जनाईएको छ।