गाईघाट– उदयपुरमा किसानलाई वितरण गर्न सरकारले पठाएको अनुदानको रासायनिक मल व्यापारीको निजी गोदाममा फेला परेको छ। कटारी नगरपालिका–४ मा दिलीप चौधरीले सञ्चालन गरेको आशुतोष ट्रेडर्स एन्ड जनरल स्टोर्स र जयमाँकाली प्रालिको गोदाममा दुई सय बोरा युरिया मल लुकाइराखिएको अवस्थामा फेला परेको हो।

जिल्ला प्रशासन कार्यालयको टोलीले बिहीबार बरामद गरेको उक्त मल तत्काल शिलबन्दी गरिएको छ। सहायक सीडीओ विक्रमप्रसाद पाण्डेयले मल कहाँबाट आयो र कस–कसको संलग्नता छ भन्नेबारे छानबिन गर्न कटारी नगरपालिकालाई जिम्मा दिइएको जानकारी दिएका छन्। उनले आवश्यक कारबाही गर्ने प्रक्रिया अघि बढाइने बताए।

कटारी नगरपालिकाकी उपमेयर गीता खड्काले प्रशासनको नेतृत्वमा भएको बजार अनुगमनका क्रममा कोक र ड्युजस्ता पेय पदार्थले छोपेर राखिएको अवस्थामा मल फेला परेको बताइन्। ‘मल कसरी व्यापारीको निजी गोदाममा पुग्यो भन्ने अझै प्रष्ट भएको छैन, तर सरकारी अनुदानकै मल रहेको पुष्टि भएको छ,’ उनले भनिन्।

कृषि सामग्री लिमिटेड गाईघाट शाखाका प्रमुख नरेशकुमार महतोले समेत भेटिएको मल सरकारी अनुदानकै भएको पुष्टि गरे। उनले किसानले मल नपाउँदा व्यापारीको गोदाममा २ सय बोरा भेटिनु रहस्यमय भएको जनाउँदै विस्तृत अनुसन्धान आवश्यक भएको बताए। तर गोदामका सञ्चालक दिलीप चौधरीले भने मल कसरी आफ्नो गोदाममा आयो भन्नेबारे आफूलाई जानकारी नभएको दाबी गरे।

मलको अभावकै वेला यस्तो घटना बाहिर आएपछि किसानले आक्रोश व्यक्त गरेका छन्। कटारीका किसान ध्रुव रोकाले सहकारीले मल आएको छैन भन्दै पटक–पटक फर्काउँदा खेतमा धान फस्टाउन नसकेको गुनासो गरे। उनले व्यापारीहरू जनप्रतिनिधि र कर्मचारीसँग मिलेर महँगोमा मल बेच्दै आएको आरोप लगाए।

उदयपुरगढी गाउँपालिका–१ का किसान मनोज खत्रीले सहकारीमा मल नपाएपछि कटारीबाट १ हजार ९५० रुपैयाँ तिरेर ५० किलोको युरिया ल्याउनुपरेको बताए। उनले मल वितरणमा व्यापक अनियमितता भएको उल्लेख गर्दै किसान बाध्यतावश महँगोमा मल किन्न पुगेको बताए।

सरकारी अनुदानमा आउने ५० किलोको युरिया मलको मूल्य ८३३ रुपैयाँ मात्र हो। सहकारीमार्फत ढुवानी खर्च जोडेर किसानलाई ९ सयदेखि १ हजार रुपैयाँमै बिक्री गर्नुपर्ने व्यवस्था छ। तर कटारी बजारमा यही मल १ हजार ८ सयदेखि २ हजार ४०० रुपैयाँसम्ममा बिक्री भइरहेको छ। उपमेयर खड्काले व्यापारीहरूले यसअघि पनि महँगोमा मल बेच्दै आएको पाइएको र चेतावनी दिइएको तर अहिले त निजी गोदाममै मल फेला परेको बताइन्।

उदयपुर जिल्लामा वार्षिक झन्डै ५ हजार टन युरिया, डिएपी र पोटासको माग हुन्छ। तर त्यसको आधा मात्र आपूर्ति हुने कृषि सामग्री लिमिटेड उदयपुर शाखाले जनाएको छ। चालू आर्थिक वर्ष ०८२÷८३ मा माग गरिएको ४ हजार ७१ टन मलमध्ये हालसम्म एक सय बोरा डिएपी मात्र आपूर्ति भएको तथ्यांक छ। यसले गर्दा किसान उत्पादनमा ठूलो समस्यामा परेका छन्।

यसरी किसानलाई वितरण गर्नुपर्ने अनुदानको मल व्यापारीको निजी गोदाममा भेटिनुले कालोबजारीको आशंका प्रष्ट भएको छ। किसान र स्थानीयवासीले दोषीहरूलाई कडा कारबाही गर्न माग गरेका छन् भने प्रशासनले छानबिन समितिमार्फत सत्यतथ्य बाहिर ल्याउने जनाएको छ।