जनकपुर– सर्लाहीमा प्रहरीले हातहतियारसहित दुई जनालाई पक्राउ गरेको छ। पक्राउ पर्नेमा रामनगर गाउँपालिका–७ सिसौट टोलका २५ वर्षीय किशन महरा र बागमती नगरपालिका–४ जिरायत टोलका १८ वर्षीय श्याम महरा छन्।

भारतको सोनवर्षाबाट बिआर ०६डिएम ९५२३ नम्बरको भारतीय मोटरसाइकलमा आउँदै गरेका किशन महरालाई सदरमुकाम मलंगवाबाट पक्राउ गरिएको प्रहरीको भनाइ छ। सोधपुछका क्रममा उनले आफ्नै साथी श्याम महरालाई हतियार राख्न दिएको स्वीकार गरेका थिए।

प्रहरीले त्यसपछि श्याम महरालाई उनको घरबाट पक्राउ गरेको हो। सोधपुछका क्रममा श्यामले हतियार बागमती नगरपालिका–१२ स्थित बागमती नदीको किनारमा लुकाइराखेको बताएका थिए। प्रहरी टोलीले उक्त स्थानमा खोजतलास गर्दा कटुवा पेस्तोल १ थान बरामद गरेको हो।

पक्राउ परेका दुवै जनाविरुद्ध जिल्ला अदालतबाट १० दिनको म्याद थप गरी थप अनुसन्धान जारी रहेको जिल्ला प्रहरी कार्यालय सर्लाहीले जनाएको छ।