अरनिको पाँडेले महिलालाई वेश्या भन्दै म्यासेज पठाएको खुलासा, अश्लील सन्देश पठाएको स्वीकार
शीर्ष खबर 
राजधानी — राष्ट्रिय स्वतन्त्र पार्टी (रास्वपा) का केन्द्रीय सदस्य तथा राष्ट्रिय योजना आयोगका पूर्वसदस्य डा. अरनिको पाँडे एक गम्भीर विवादमा तानिएका छन्। उनले बेलायत बस्ने एक महिलालाई वेश्या भन्दै अश्लील सन्देश पठाएको तथ्य बाहिरिएको छ।
शुक्रबार दर्ता भएको अभियोग पत्रमा पाँडेले पहिलो चरणमा ह्वाट्सएपमार्फत आपत्तिजनक शब्द प्रयोग गर्दै महिलालाई गाली गरेका थिए। महिलाले उनलाई ब्लक गरेपछि उनले इमेलमार्फत अश्लील र चरित्रहत्या गर्ने खालका सन्देश पठाएको उल्लेख छ।
अभियोगपत्रमा महिलाले आफ्नो छोरा साइन्स अध्ययन गर्न रुचि रहेकोले पाँडेसँग केही कुरा बुझौं भनी सुझाव लिनको लागि सम्पर्क गरेकोमा इमेल र ह्वाट्सएपमार्फत विभिन्न अश्लील म्यासेज पठाई मानसिक यातना दिएको, अपमान गरी दुःख दिएको बताएकी छिन्।
तर, तर पाँडेले भने आफ्नो बयानमा २०६९ सालतिर नै जाहेरवाला महिलासँग आफ्नो श्रीमतीमार्फत चिनजान भई कहिलेकाहीँ पारिवारिक भेटघाटसमेत हुने गरेको बताएका छन्। असार २५ गते ती महिलाले बेलायतबाट आफू नेपाल आउन लागेको र भेट गरौं भनी अनुरोधसमेत गरेको पाँडेले बताएका छन्।
श्रीमती नेपाल नभएको थाहा पाएपछि भेट्न बोलाउने गर्ने गरेको व्यवहार मन नपरेपछि म्यासेज गरेको बयानमा भनेका छन्। उनको इमेलबाट गएको म्यासेजमा शारीरिक सम्बन्ध राखेको कुराहरू समेत उल्लेख छ।
अभियोगपत्र अनुसार, इमेल ठेगाना आफ्नै भएको र उक्त सन्देश आफैंले पठाएको हुनसक्ने पाँडेले प्रहरीसमक्ष स्वीकार गरेका छन्। यद्यपि, इमेलमार्फत पठाइएका शब्दहरू ‘रिस र आवेगमा’ गएको हुनसक्ने बताउँदै उनले प्रस्ट स्मरण नभएको भनेको अभियोगपत्रमा उल्लेख छ।
यस आधारमा जिल्ला सरकारी वकिल कार्यालयले काठमाडौं जिल्ला अदालतमा पाँडेविरुद्ध विद्युतीय कारोबार ऐन, २०६३ को दफा ४७(१) अन्तर्गत अभियोग पत्र दर्ता गरेको छ। सो दफामा पाँच वर्षसम्म कैद, एक लाख रुपैयाँसम्म जरिवाना वा दुवै सजायको प्रावधान छ।
हाल न्यायाधीश ध्रुवराज कार्कीको इजलासमा पाँडेको बयान सुरु भइसकेको छ। बयानपछि थुनछेक बहस हुनेछ र त्यसपछि उनी कारागार पुर्पक्षमा पठाइने वा धरौटीमा छाडिने भन्नेबारे आदेश आउनेछ।
बुधबार साँझ प्रहरीले पाँडेलाई केन्द्रीय साइबर ब्यूरो, भोटाहिटीबाट पक्राउ गरेको थियो। उनलाई बिहीबार अदालतले चार दिन हिरासतमा राख्न म्याद दिएको थियो। तर, यसै प्रकृतिको मुद्दामा एमाले नेता ऐन महरालाई हाजिरी जमानीमा छाड्दा पाँडेलाई मात्र हिरासतमा राखिएको भन्दै राज्य संयन्त्र चयनमुखी भएको आलोचना भएको छ।
यसै दबाबबीच शुक्रबारै अभियोग पत्र दर्ता गरिएको हो। वातावरणविद् भनेर चिनिने पाँडे २०७९ भदौमा रवि लामिछाने नेतृत्वको रास्वपामा प्रवेश गरेका थिए। पार्टी सरकारमा सहभागी हुँदा उनी २०८० सालमा राष्ट्रिय योजना आयोगको सदस्यसमेत बनेका थिए। हाल उनी अन्तर्राष्ट्रिय एकीकृत पर्वतीय विकास केन्द्र (ICIMOD) मा पनि कार्यरत छन्।
