विराटनगर— झुम्का कारागारबाट फरार रहेका कर्तव्य–ज्यानका दोषी डम्बरबहादुर मगर भनिने शम्भू मगर घरमै पक्राउ परेका छन्। केही दिनदेखि विशेष निगरानी गरिरहेको प्रहरीले झापाको शिवसताक्षी नगरपालिका–११ शेर्माटोलस्थित उनको घरबाटै शुक्रबार पक्राउ गरेको हो।

४५ वर्षीय मगर गत भदौ २४ गते जेन–जी आन्दोलनको बेलाको अस्थिर वातावरणका बीच भागेका थिए। कर्तव्य ज्यान मुद्दामा दोषी ठहर भई सजाय भुक्तान गरिरहेका उनी फरार भएपछि प्रहरी प्रशासनले उनीमाथि निगरानी बढाएको थियो।

इलाका प्रहरी कार्यालय झिलझिलेबाट खटिएको टोलीले मगरलाई घर आसपास गुपचुप बसिरहेको अवस्थामा भेटेर नियन्त्रणमा लिएको हो। पक्राउपछि उनलाई आवश्यक कानुनी प्रक्रिया पूरा गरी पुनः झुम्का कारागार, सुनसरी पठाउने तयारी भइरहेको झापा प्रहरीले जनाएको छ।