काठमाडौँ— शंखमुलस्थित भ्याली ब्वाइज होस्टलमा सामान्य विवादले उग्र रूप लिएपछि २२ वर्षीय युवकको ज्यान गएको घटनामा प्रहरीले मधेश प्रदेशका दुई युवकलाई पक्राउ गरेको छ।

दाङको घोराही उपमहानगरपालिका–१७ का २२ वर्षीय बसन्त कालाखेतीको हत्या आरोपमा बाराको कलैया उपमहानगरपालिका–३ का १८ वर्षीय शेखर यादव र २० वर्षीय प्रमित पटेल पक्राउ परेका हुन्।

प्रहरीका अनुसार शुक्रबार बिहान होस्टलमा सामान्य विवाद भएपछि यादव र पटेलले कालाखेतीमाथि कुटपिट गर्नुका साथै धारिलो हतियार प्रहार गरेका थिए। टाउको र घाँटीमा गम्भीर चोट लागेका कालाखेतीलाई उपचारका लागि मीनभवनस्थित निजामती कर्मचारी अस्पताल लगिएको थियो।

उपचारकै क्रममा उनको मृत्यु भएको प्रहरीले जनाएको छ। घटनालगत्तै प्रहरीले शेखर यादवलाई नियन्त्रणमा लिएको थियो। फरार भएका पटेलको खोजी गर्ने क्रममा उनलाई मकवानपुरको भैंसेबाट पक्राउ गरिएको उपत्यका अपराध अनुसन्धान कार्यालयका एसएसपी सन्तोष खड्काले जानकारी दिएका छन्।

प्रहरीका अनुसार घटनामा चार जना अन्य व्यक्ति पनि घटनास्थलमा उपस्थित थिए। उनीहरूलाई प्रहरी वृत्त नयाँ बानेश्वरमा राखेर घटनाबारे सोधपुछ भइरहेको छ। उनीहरूको घटनामा संलग्नता वा भूमिकाबारे भने अनुसन्धानबाट थप तथ्य खुल्ने प्रहरीले जनाएको छ।

प्रारम्भिक अनुसन्धानमा होस्टलमा बस्ने युवाहरूबीच भएको विवाद नै आक्रमणको कारण देखिए पनि विवाद के विषयमा सुरु भयो, आक्रमणमा कसको भूमिका कस्तो थियो र धारिलो हतियार कसरी प्रयोग भयो भन्ने विषयमा प्रहरीले थप अनुसन्धान गरिरहेको छ।

मृतक कालाखेती दाङका हुन् भने पक्राउ परेका दुवै युवक बारा, कलैया–३ का हुन्। एउटै होस्टलमा बस्ने युवाहरूबीचको विवाद हिंसात्मक बनेपछि भएको यो घटनाले काठमाडौंका आवासीय होस्टलमा सुरक्षा तथा निगरानीको अवस्थामाथि पनि प्रश्न उठाएको छ।

प्रहरीले पक्राउ परेका दुवै जनामाथि कानुनी प्रक्रिया अघि बढाउने तयारी गरेको छ। घटनाको कारण र संलग्न सबैको भूमिकाबारे अनुसन्धान पूरा भएपछि मात्रै हत्याको विस्तृत पाटो खुल्ने प्रहरीको भनाइ छ।