बालकलाई ट्याक्टर चलाउन दिँदा दुर्घटना, १ बालिकाको मृत्यु
शीर्ष खबर 
काठमाण्डौं– नवलपुरमा बालकलाई ट्याक्टर चलाउँन दिँदा दुर्घटना भएर १ बालिकाको मृत्यु भएको छ।
बुलिङटार गाउँपालिका–५ मा १५ वर्षीय बालक धनबहादुर डिस्वाले चलाएको लु ५ त ६५९ नम्बरको ट्याक्टर दुर्घटनामा १८ वर्षीय बालिका बिरमाया सारूको मृत्यु भएको हो।
खेतमा धान लिन जानेक्रममा बिरमाया ट्याक्टरबाट खसेको र सोही ट्याक्टरको पछाडीको चक्काले किचेर ज्यान गएको प्रहरीले जनाएको छ।
उमेर नपुगेका बालकले चलाएको ट्याक्टर दुर्घटना भएपछि चालकसमेत रहेका ट्याक्टरधनीले भने चलाखी गर्न खोजेको पाईएको छ। उनले नक्कली चालक खडा गरेर जिल्ला प्रहरी कार्यालयमा जिम्मेवारी लिन पठाएको प्रहरीले जनाएको छ।
जिल्ला प्रहरी कार्यालय नवलपुरका डीएसपी वेदबहादुर पौडेलका अनुसार लाइसेन्ससहितका चन्द्रबहादुर आले प्रहरीसमक्ष उपस्थित भएका थिए। प्रहरीले ट्याक्टरधनी रिमेश गुरुङ र नक्कली चालकलाई नियन्त्रणमा लिएर अनुसन्धान गरिरहेको छ।
