चितवन- चितवनको भरतपुर २९ स्थित सिमलतालमा पहिरोले बगाएका दुई वटा बसका १३ जनाको शव फेला परेका छन्। ति मध्ये ८ जनाको मात्रै सनाखत भएको छ।

४ पुरुष र एक महिलाको सनाखत हुन बाँकी रहेको चितवनका सीडीओ इन्द्रदेव यादवले बताए। शुक्रबार बिहान साढे ३ बजे काठमाडौंबाट रौतहटको गौरतर्फ जाँदै गरेको बागमती प्रदेश ०३–००१ ख २४९५ नम्बरको गणपति डिलक्स र वीरगन्जबाट काठमाडौंतर्फ जाँदै गरेको बागमती प्रदेश ०३–००६ ख १५१६ नम्बरको एन्जल डिलक्स लाई लेदोसहितको पहिरोले यात्रुसहित त्रिशूली नदीमा बगाएको थियो।

एन्जल डिलक्समा टिकट काटेका २७ र नकाटेका ११ जना गरी ३८ जना तथा गणपती डिलक्समा टिकट काटेका २४ र नकाटेका ३ गरी २७ जना रहेको प्रहरीले जानकारी दिएको छ। दुईवटा बसमा ६५ जना सवार रहेकोमा गौरतर्फ जाँदै गरेको गणपती बसका ३ जना बच्न सफल भएका छन्।

रौतहटका नन्दन दास, जुगेश्वर राय र सरोजकुमार गुप्ता दुर्घटनामा परे पनि बच्न सफल भएका हुन्। बाँकी ६२ जनाको सोहीदिनबाट खोजिकार्य भइरहेको छ। ती मध्ये १३ वटा शव फेला पारेको हो।

गणपती डिलक्समा सवार भारतीय नागरिक ऋषिपल साहको शव भरतपुर महानगरपािलका २८ स्थित गोलाघाटमा फेला परेको थियो भने एन्जल डिलक्समा रहेका चितवनका विकास परियारको शव गैडाकोट नगरपालिका ७ स्थित गैरीमा नारायणी नदी किनारमा फेला परेको थियो।

गणपती डिलक्समा सवार सर्लाहीको बरथहवा नगरपालिका ३ का रमित कुसर माझीको शव पनि गैडाकोटको गैरीस्थित किनारमै फेला परेको थियो। भारतीय नागरिक जय प्रकाश ठाकुरको शव भरतपुरको सालबासस्थित किनारमा र सजाद अन्सारीको शव गैडाकोटको गैरीस्थित नारायणी किनारमा भेटिएको हो।

भरतपुरकै सुदिप बिक, रौतहटका फिरोज राहुप मिया र बारका परमानन्द पण्डितको शव आइतबार त्रिवेणी ब्यारेजमा फेला परेको थियो। त्रिवेणी ब्यारेजमै सोमबार थप तीनवटा शव फेला परेका छन्। तर सनाखत हुन सकेको छैन। भरतपुरको सिसवारस्थित किनारमा र मध्यविन्दु नगरपालिका २ भुताहामा फेला परेको शव पनि सनाखत हुन बाँकी छ।

नवनियुक्त गृहमन्त्री रमेश लेखकले सिमलतालमा गएको पहिरोबारे अध्ययन गर्न समिति गठन गर्ने पहिलो निर्णय गरेका छन्। पदभारपछि सहसचिव छवि रिजालको संयोजकत्वमा समिति गठन गरेका हुन।

समितिले राहत र व्यवस्थापनबारे अध्ययन गरेर १० दिनभित्र प्रतिवेदन बुझाउनेछ।