विराटनगर– करिव ४ महिनादेखि अचेत अवस्थामा रहेका मोरङको ग्रामथान गाउँपालिकाका अध्यक्ष जयप्रकाश गच्छदार थारुको निधन भएको छ। ग्रामथान–४ घर भएका ५६ वर्षीय थारुको सोमबार दिउँसो घरमै निधन भएको हो।

१० माघ ०८० देखि उनी अचेत अवस्थामा थिए। नेपाली कांग्रेसले विराटनगरमा आयोजना गरेको छलफलमा सहभागि हुन पुगेका थारु त्यही वेहोस भएर ढलेका थिए। उनलाई उपचारका लागि पारस अस्पताल हुँदै नोबेल शिक्षण अस्पताल भर्ना गरिएको थियो।

उपचारमा संलग्न चिकित्सकले थारुलाई ‘ब्रेन ह्याम्रेज’ भएको बताएका छन्। त्यस यता अचेत अवस्थामै अस्पतालमा रहेका उनलाई १ जेठमा घर लगिएको थियो।

थारु ०७९ सालको स्थानीय तह निर्वाचनमा नेपाली कांग्रेसका तर्फबाट उम्मेदवार भई अध्यक्षमा निर्वाचित भएका थिए। अध्यक्ष बिरामी परेपछि गाउँपालिकाकी उपाध्यक्ष गुणवतीदेवी थारुले कार्यवाहक अध्यक्षको जिम्मेवारी पाएकी छिन्।