लम्जुङमा पहिरोमा पुरिएर एकै परिवारका ४ सहित ५ जनाको मृत्यु

काठमाण्डौं — लमजुङमा पहिरोमा पुरिएर एकै परिवारका ४ जनाको मृत्यु भएको छ।
क्व्होलासोथार गाउँपालिका ३, बगुमका ७० वर्षिय रुद्रमान गुरुङ, उनकी बुहारी ३७ वर्षीया पञ्चकुमारी गुरुङ, पञ्चकुमारीका २ छोरीहरू अन्दाजी ९ वर्षीया इच्छा र अन्दाजी ५ वर्षीया नम्रता भन्ने निष्मा गुरुङको मृत्यु भएको हो।
३६ वर्षीय भीमबहादुर घले घाइते भएपछि उपचारका लागि सदरमुकाम बेंसीसहर पठाइएको छ। मंगलबार राति पहिरोले वटा घर बगाएको थियो। ती मध्ये २ घरका ४ जना बेपत्ता भएका थिए। खोजतलासका क्रममा बुधबार दिउँसो चारैजनाको शव फेला परेको क्व्होलासोथार गाउँपालिका अध्यक्ष सूर्यप्रसाद गुरुङले जानकारी दिए।
आमा र २ छोरीको शव घरबाट करिब १५–२० मिटरमुनि र रुद्रमानको शव आफ्नै आँगनमा भेटिएको थियो। यसैगरी, दोर्दी गाउँपालिका ९, धैरेनी सुनारगाउँमा मंगलबार राति पहिरोले घर पुरिँदा १६ वर्षीय विकल सुनारको मृत्यु भएको छ।
उनका दाइ १८ वर्षीय मिलन सुनार घाइते भएका छन् । २ दाजुभाइ सुतिरहेको अवस्थामा माथिबाट पहिरो घरमा खसेपछि दुवैजना घाइते भएका थिए। घाइते दुवैजनालाई उपचारका लागि बेंसीसहरस्थित लमजुङ अस्पताल पठाईएकोमा अस्पताल पुग्नासाथ मिलनको मृत्यु भएको थियो।