काठमाण्डौं– काठमाडौं महानगरपालिका–३१, शंखमुलमा स्नुकर हाउस सञ्चालन गरेर बसेका बाराका ४० वर्षीया रुपक वान्तवाको हत्या भएको छ।

आफैंले सञ्चालन गरेको ‘द टाइम पास स्नुकर एन्ड खाजा घर’ भित्र आईतबार राती करिव पौने २ बजे उनको हत्या भएको हो। आक्रमण भएको र उपचारका क्रममा मृत्यु भएको जिल्ला प्रहरी परिसर काठमाडौंका एसपी नवराज अधिकारीका अनुसार उनीमाथि धारिलो हतियार तथा फलामको डण्डीले आक्रमण भएको छ।

वान्तवामाथि आक्रमण भएको विषयमा एक महिलाले प्रहरी वृत्त नयाँ बानेश्वरलाई फोनमार्फत जानकारी गराएकी थिइन्। ती महिला स्नुकर हाउसकै कामदार भएको खुलेको छ। उनकै सूचनाका आधारमा प्रहरी घटनास्थलमा पुगेको थियो।

प्रहरी पुग्दा वान्तवा सोफामा उत्तानो परेको अवस्थामा अचेत थिए। उनको टाउकामा गम्भीर चोट थियो। निधारमाथिको भागमा धारिलो हतियार प्रहार गरेजस्तो चोट रहेको प्रहरीले जनाएको छ। शरीरका अन्य भागमा पनि हिर्काएका चोटहरु छन्।

बान्तवालाई प्रहरीले तत्कालनै मीनभवनस्थित निजामती कर्मचारी अस्पतालमा भर्ना गरेको थियो। डाक्टरले राती करिव साढे २ बजे उनलाई मृत घोषणा गरेका थिए। प्रहरीलाई सूचना दिने महिलाले राती एक व्यक्ति भाग्दै गरेको देखेको बताएकी छिन्।

प्रहरीले वान्तवाको हत्या गरेको आशंकामा केही व्यक्तिलाई पक्राउ गरेको छ। तर, हत्या कस्ले र किन गर्यो भन्ने यकिन भई सकेको छैन।

प्रहरीका अनुसार बारा घर भएका वान्तवाले जस्तापाताको टहरामा खाजाघर र स्नुकर हाउस सञ्चालन गर्दै आएका थिए।