राजधानी– कैलालीमा साथीको जन्मदिन मनाउन गएका चार किशोरको खोलामा नुहाउने क्रममा डुबेर मृत्यु भएको छ।

इलाका प्रहरी कार्यालय मालाखेतीका डीएसपी रणबहादुर चन्दका अनुसार घटना बिहीबार दिउँसो भएको हो। गोदावरी नगरपालिका–९, सहरी झोलुंगे पुल नजिक नुहाउन पसेका धनगढी उपमहानगरपालिका–४ का १७ वर्षीय सक्षम जोशी, १६ वर्षीय जेव भण्डारी, १७ वर्षीय जाबेज भण्डारी र १५ वर्षीय प्रतीक चौधरी दिउँसो १२ बजे सम्पर्कविहिन भएका थिए।

‘७ जना साथीहरूको समूह जन्मदिन मनाउन गएको थियो। खोलामा नुहाउने क्रममा उनीहरूले हात समातेर तर्न खोज्दा गहिरो भागमा फसेछन्’ डीएसपी चन्दले भने ‘हात छुटेपछि अन्य तीन जना सकुशल बाहिर आएका छन्।’

स्थानीयवासी, नेपाल प्रहरी र सशस्त्र प्रहरी बलको संयुक्त प्रयासमा खोजी गर्दा उनीहरूको शव अपराह्न साढे ४ बजे फेला परेको थियो। १७ वर्षका नवीन डडाल, युवराज कुवर र आकाश मल्ल भने सकुशल छन्।

मृतकमध्ये तीन जना वाल्मीकि इन्टरनेसनल स्कूल र एक जना ग्यालेक्सी स्कूलमा कक्षा ११ मा अध्ययनरत रहेको प्रहरीले जनाएको छ। प्रहरीले घटनाको थप अनुसन्धान गरिरहेको जनाएको छ।