बारा– बाराको पर्सौनी गाउँपालिका–६, भलुही चोकस्थित पानी उद्योग (किरण वेभरेज प्रालि)का व्यवस्थापकको निर्मम हत्यामा संलग्न रहेको अभियोगमा प्रहरीले दुई जनालाई पक्राउ गरेको छ। पर्साको वीरगञ्ज महानगरपालिका–२२, मनियारीका २१ वर्षीय राजनकुमार राम र ३२ वर्षीय प्रमोद साह पक्राउ परेका हुन्।

१२ मंसिरको बिहान उद्योग नजिकैको खोल्सामा व्यवस्थापक रामकिशोर सिंहको शव भेटिएको थियो। प्राथमिक अनुसन्धानमै यो हत्या उद्योगभित्र नियोजित ढंगले गरिएको प्रमाण फेला परेको प्रहरीले जनाएको छ।

प्रहरीका अनुसार हत्या गर्ने मुख्य योजनाकार राजन सोही उद्योगमा सवारी चालकका रूपमा काम गर्थे। उनले व्यवस्थापक सिंहसँग पटक–पटक विवाद गर्ने गरेकोको र एक वर्षअघि गढीमाई मेलाको समयमा गाडीको क्लज प्लेट जलेपछि सिंहले राजनलाई कठोर रूपमा गाली गरेका थिए। उक्त झोकमा उनले उद्योग छाडेका थिए।

करिब एक वर्षपछि, गत १ कात्तिकदेखि पुनः काममा फर्किएका राजनले उद्योगले तोकेको भन्दा बढी मूल्यमा पानी बेच्ने गरेको थाहा पाएपछि व्यवस्थापक सिंहले उनलाई १० मंसिरमा फेरि कामबाट निकाली दिए। यही निर्णयबाट आक्रोशित राजनले प्रतिशोधको भावना बोकेर हत्या योजना बनाएको अनुसन्धानले देखाएको छ।

११ मंसिर साँझ राजनले वीरगञ्जमा साथी प्रमोद साहसँग मदिरा पिउँदै व्यवस्थापकलाई समाप्त गर्ने योजना बनाएको प्रहरीको दाबी छ। मदिरा सेवनपछि दुवैले वीरगञ्जबाटै घरेलु धरिलो हतियार लिएर आए र उद्योगभित्रै सिंहको हत्या गरे। ‘छुरा र इँट प्रयोग गरी अत्यन्त क्रूर ढंगले हत्या गरिएको देखिन्छ,’ बारा प्रहरीले घटनाबारे बताएको छ।

हत्या गरिसकेपछि दुवै जना भारततर्फ भाग्ने तयारीमा थिए। तर, प्रहरीको सकृयताले उनीहरू उम्कन सकेनन्। मुख्य योजनाकार राजनलाई पर्साको भिस्वा नाका हुँदै भारत प्रवेश गर्न खोज्दै गर्दा छिपहरमाई गाउँपालिका–५ बाट पक्राउ गरियो। अर्का आरोपी प्रमोद साह भने वीरगञ्ज महानगरपालिका–२२ स्थित घरबाटै घरबाट समातिएका हुन्।

‘पर्सा प्रहरीको समन्वयमा घटना भएको १६ घण्टाभित्रै दुवै अभियुक्तलाई नियन्त्रणमा लिन सफल भयौं,’ जिल्ला प्रहरी कार्यालय बाराका निमित्त सूचना अधिकारी इन्स्पेक्टर खेमप्रसाद नेपालले बताए।

पक्राउ परेका दुवैजनामाथि कर्तव्य ज्यान मुद्दा दर्ता गरी जिल्ला अदालत बाराबाट ७ दिनको म्याद थपिएको छ। प्रहरीका अनुसार घटनामा प्रयोग भएका हतियार र अन्य प्रमाण संकलन कार्य जारी छ।

सर्लाहीको धनकौल गाउँपालिका–२ घर भई पर्सौनीस्थित पानी उद्योगमा व्यवस्थापकका रूपमा कार्यरत रामकिशोर सिंहको शव १२ मंसिर बिहान खोल्सामा भेटिएपछि सुरु भएको अनुसन्धानले उद्योगभित्रै नियोजित अपराध भएको स्पष्ट पारेको प्रहरीले जनाएको छ।