बलेविरुद्ध संगमका भाइ सौगातको धम्कीः ‘कानुनले न्याय दिएन भने भगवानले तिमीलाई मबाट जोगाओस’
शीर्ष खबर 
काठमाडौँ– फेसबुकबाट बलात्कारको आरोप लागेपछि पक्राउ परेका कलाकार सागर लम्साल ‘बले’ लाई पीडित परिवारबाट सार्वजनिक रुपमै धम्की आएको छ। सामाजिक सञ्जाल फेसवुक मार्फत सार्वजनिक भएको धम्की पीडित भनिएकी संगम विष्टका भाई सौगातबाट आएको हो।
सौगातले सामाजिक सञ्जालमा लेखेको लामो वक्तव्यमा दिदीप्रति पूर्ण समर्थन जनाउँदै आरोपितलाई सीधै लक्षित गर्दै ‘यदि कानुनले न्याय दिन सकेन भने भगवानले तिमीलाई मबाट जोगाओस्’ भन्ने शब्द प्रयोग गरेका छन्, जसले घटनालाई थप तातो बनाएको छ।
सौगातको अभिव्यक्ति केवल भावनात्मक प्रतिक्रिया मात्र नभई परिवारको सामूहिक आक्रोशको प्रतिनिधित्वका रूपमा देखिएको छ। उनले आफ्नो दिदीले वर्षौँदेखि भोग्दै आएको पीडालाई अन्ततः सार्वजनिक गर्न सकेको भन्दै त्यसको खुलेर प्रशंसा गरेका छन्। साथै, आफूहरू आरोपित व्यक्तिसँग लामो समयदेखि नजिकको सम्बन्धमा रहेको उल्लेख गर्दै यस्तो आरोप विश्वास गर्न कठिन भए पनि दिदीको भनाइप्रति पूर्ण भरोसा रहेको स्पष्ट पारेका छन्।
वक्तव्यमा उनले परिवारको पहिचान, योगदान र विश्वसनीयतालाई जोड दिँदै आरोपलाई ‘नक्कली’ भन्नेहरूको मानसिकतामाथि प्रश्न उठाएका छन्। कानुनी प्रक्रियाबाट न्याय नपाए वैकल्पिक कठोर कदम चाल्न सक्ने संकेत उनले दिएका छन्, जसले सामाजिक सञ्जालमा व्यापक प्रतिक्रिया निम्त्याएको छ। उनका शब्दहरूमा कानुनी मार्गप्रतिको विश्वास र व्यक्तिगत आक्रोशबीचको द्वन्द्व स्पष्ट देखिन्छ।
संगम विष्टले अचानक सामाजिक सञ्जालमार्फत आरोप सार्वजनिक गरेपछि उनको परिवारसमेत स्तब्ध बनेको थियो। परिवारभित्र पहिल्यै कुनै जानकारी नदिइएको अवस्थामा आएको उक्त खुलासाले एकैपटक सबैलाई झस्काएको थियो। यद्यपि, अहिले परिवारका सदस्यहरू पूर्ण रूपमा संगमको पक्षमा उभिएका छन् र न्यायका लागि लड्ने प्रतिबद्धता जनाइरहेका छन्।
यस घटनाले फिल्म उद्योगभित्रको सम्बन्ध, विश्वास र शक्ति सन्तुलनबारे पनि गम्भीर प्रश्न उठाएको छ। एकातिर गम्भीर आरोप छ भने अर्कोतिर कानुनी प्रक्रिया अझै प्रारम्भिक चरणमै छ। यहीबीच पीडित पक्षबाट आएको यस्तो कडा अभिव्यक्तिले सामाजिक दबाब थप बढाएको छ, जसले आगामी दिनमा अनुसन्धान र न्यायिक प्रक्रियामा पनि प्रभाव पार्न सक्ने देखिन्छ।
यो पनि,
