धुलिखेल — काभ्रेको नमोबुद्धस्थित एक होटलमा प्रहरी कार्यालय भकुण्डेबेसीका इञ्चार्ज सई गणेश श्रेष्ठ एक युवतीसँग भेटिएपछि स्थानीयले राति होटलमै पुगेर उनीहरूलाई बाहिर निकालेका छन्। आइतबार राति नमोबुद्ध बजारस्थित होटल नमोबुद्धमा युवतीसँग बसेका श्रेष्ठलाई स्थानीय युवाहरूले ढोका खोल्न लगाएर बाहिर निकालेपछि घटनाको भिडियो सामाजिक सञ्जालमा सार्वजनिक भएको छ।

घटनापछि जिल्ला प्रहरी कार्यालय काभ्रेले श्रेष्ठलाई आवश्यक छानबिनका लागि धुलिखेल झिकाएको छ। होटलमा भेटिएकी युवती गत फागुन २१ मा सम्पन्न प्रतिनिधिसभा सदस्य निर्वाचनका क्रममा निर्वाचन प्रहरी (म्यादी)का रूपमा भर्ना भएकी थिइन्। निर्वाचन प्रहरी छनोट प्रक्रियामा श्रेष्ठ स्वयं खटिएको र त्यसक्रममा ती युवतीसँग उनको चिनजान भएको स्थानीयको भनाइ छ। उनीहरूबीच प्रेम सम्बन्ध रहेको दाबीसमेत स्थानीयले गरेका छन्। यद्यपि, प्रहरी अनुसन्धानबाट यसबारे कुनै निष्कर्ष सार्वजनिक भएको छैन।

स्थानीय युवाहरू मध्यरातमा होटल पुगेपछि कोठाको ढोका खोल्न लगाएर श्रेष्ठ र युवतीलाई बाहिर निकालेका थिए। उनीहरूले दुवैलाई विभिन्न प्रश्न गर्दै भिडियोसमेत खिचेका थिए। सार्वजनिक भएको भिडियोमा स्थानीयले प्रहरी अधिकारी र युवतीसँग घटनाबारे सोधपुछ तथा केरकार गरिरहेको देखिन्छ।

प्रहरीका अनुसार होटलमा भेटिएका दुवै जनालाई जिल्ला प्रहरी कार्यालयमा ल्याइएको छ। श्रेष्ठमाथि के विषयमा र कुन कानुनी आधारमा अनुसन्धान अघि बढाइएको हो भन्नेबारे प्रहरीले औपचारिक विवरण सार्वजनिक गरिसकेको छैन। होटलमा दुवै जना आपसी सहमतिमा बसेको भनिए पनि स्थानीयले भने उनीहरूलाई ‘रंगेहात’ भेटिएको दाबी गर्दै हस्तक्षेप गरेका थिए।

पाँचखालमा बस्ने ती युवती विवाहित हुन् वा अविवाहित भन्ने खुलेको छैन। श्रेष्ठ भने विवाहित प्रहरी अधिकारी हुन्। उनीहरूबीचको व्यक्तिगत सम्बन्धबारे पनि आधिकारिक पुष्टि भइसकेको छैन।

घटनाले श्रेष्ठको व्यक्तिगत आचरणसँगै उनको पछिल्लो प्रहरी सेवाको कार्यसम्पादनसम्बन्धी विवादलाई समेत पुनः चर्चामा ल्याएको छ। श्रेष्ठले गत जेठमा जिल्ला प्रहरी कार्यालय काभ्रेबाट उत्कृष्ट प्रहरीको पुरस्कारसमेत पाएका थिए।

तर, पछिल्लो समय श्रेष्ठविरुद्ध स्थानीय सामाजिक संघसंस्था तथा अगुवाहरूले विभिन्न विषयमा उजुरी गरेको प्रहरी स्रोतले जनाएको छ। असई हुँदा उनी काभ्रे जिल्ला ट्राफिक प्रहरीका रूपमा कार्यरत थिए। सईमा बढुवा भएपछि पुनः काभ्रेमै सरुवा भएका श्रेष्ठले केही महिनादेखि भकुण्डेबेसीस्थित प्रहरी कार्यालयको इञ्चार्जको जिम्मेवारी सम्हाल्दै आएका थिए।

प्रहरी स्रोतका अनुसार नदीजन्य पदार्थ उत्खननसँग जोडिएका विषयमा पनि श्रेष्ठ विवादमा पर्दै आएका थिए। स्थानीयले नदीजन्य पदार्थ उत्खनन गर्ने टिप्परबाट ‘महिनाबारी’ रकम असुली भइरहेको र त्यसका कारण वातावरणमा असर परेको गुनासो गर्दै आएका थिए। तर, त्यस्ता गुनासो सम्बोधन गर्नुको सट्टा गुनासो गर्ने सर्वसाधारणलाई नै दुःख दिने गरेको आरोप श्रेष्ठमाथि लागेको स्रोतको भनाइ छ।

नदी आसपासका बस्तीमा घर निर्माणका लागि आवश्यक निर्माण सामग्री लैजान खोज्ने सर्वसाधारणलाई समेत रोक्ने गरेको भन्दै स्थानीयमा उनीप्रति असन्तुष्टि बढेको बताइएको छ। यी आरोपको स्वतन्त्र पुष्टि भने हुन बाँकी छ।

स्थानीयको गुनासोपछि गत साउन २८ गते वडा नम्बर ४ स्थित एक क्रसर उद्योगको अनुगमन गर्न सीडीओ गोपालकुमार अधिकारी, जिल्ला समन्वय प्रमुख दीपक गौतम र जिल्ला प्रहरी प्रमुख एसपी रविन कार्की पुगेका थिए। सो क्रममा स्थानीयले श्रेष्ठको कार्यशैलीबारे उनीहरूसमक्ष समेत गुनासो गरेका थिए।

त्यसपछि जिल्ला प्रहरी कार्यालयले श्रेष्ठसँग स्पष्टीकरण मागेको थियो। तर, त्यसबेला उनीमाथि थप कारबाही नभएको बताइएको छ। अहिले होटलमा युवतीसँग भेटिएको घटनापछि भने श्रेष्ठलाई जिल्ला प्रहरी कार्यालयमा झिकाइएको छ। व्यक्तिगत आचरणसँग जोडिएको घटनालाई लिएर प्रहरीले गर्ने छानबिन र त्यसक्रममा बाहिर आएका उनका पुराना विवादबारे थप अनुसन्धानपछि मात्रै वास्तविक अवस्था स्पष्ट हुने देखिएको छ।

यस घटनामा होटलमा भेटिएकी युवतीको व्यक्तिगत गोपनीयता र सार्वजनिक रूपमा फैलिएको भिडियोको विषयसमेत संवेदनशील छ। प्रहरी अनुसन्धानले श्रेष्ठ र युवतीबीचको सम्बन्ध, घटनाको वास्तविक प्रकृति तथा त्यससँग जोडिएका अन्य आरोपबारे तथ्य स्पष्ट पार्नुपर्ने देखिन्छ।