काठमाण्डौं– नेपालमा बलात्कारका घट्ना तिव्र रुपमा वढेको पुष्टि भएको छ। देशभरका जेलमा रहेका २८ हजार कैदीबन्दी मध्ये सबैभन्दा धेरै बलात्कार घटनामा संलग्न व्यक्तिहरू छन्।

बुधवार बसेको प्रतिनिधिसभा अन्तर्गतको राज्यव्यवस्था तथा सुशासन समितिको बैठकमा कारागार व्यवस्थापन विभागका महानिर्देशक जयनारायण आचार्यले यस्तो जानकारी दिएका हुन। सांसदहरूलाई दिएको जानकारीअनुसार नेपालमा हाल कूल कैदी बन्दी २८ हजार ६१३ छन्। जसमा थुनुवा १० हजार ९३२ र कैदीबन्दी १७ हजार ६८१ छन् ।

जेलमा २६ हजार ९६६ पुरुष र १ हजार ६४७ महिला छन। ६५ वर्ष माथिका ज्येष्ठ नागरिक ६१८ रहेका छन् । यस्तै १ हजार ४३२ विदेश नागरिक छन् भने जेलमा रहेका महिलाहरूमा आश्रित बालबालिकाको संख्या ६१८ छ।

सबैभन्दा धेरै बलात्कारका ७ हजार ४५३ जना, लागु औषध प्रयोगकर्ता कैदी ६ हजार ११४ र ज्यान मारेको अभियोगमा जेल परेकाहरु ४ हजार ७९४ जना छन्। देशका ७२ जिल्लामा ७५ वटा कारागार छन्। भक्तपुर, धनुषा, बारा, पूर्वी नवलपरासी र रुकुम पूर्वमा कारागार छैन। काठमाडौँ, दाङ र बाँकेमा दुई–दुईवटा कारागार छन्।