राजविराज — सप्तरीको कञ्चनरुप नगरपालिका स्थित बदगामामा इन्धन बोकेको ट्याङकरले मोटरसाईकललाई ठक्कर दिँदा शुक्रबार दुई जनाको मृत्यु भएको छ।

पूर्वपश्चिम राजमार्ग अन्तर्गत कन्चनपुरबाट भारदह तर्फ जाँदै गरेको को १ ख ७४१४ नम्बरको डिजल लोड गरेको ट्याङकरले विपरित दिशामा जाँदै गरेको प्र १–०२–०४७ प १२८० को मोटरसाइकललाई ठक्कर दिएको थियो।

दुर्घटनामा मोटरसाइकलमा सवार सुनसरी हरिनगरा गाउँपालिका–३ का ४१ वर्षीय महेशकुमार मेहताको घट्नास्थलमै मृत्यु भएको थियो। मोटरसाइकलमा सवार सोही ठाउँका ४२ वर्षीय जयप्रकाश मेहता घाइते भई गजेन्द्र नारायण सिंह अस्पताल राजबिराज ल्याइएको थियो। उनको पनि उपचारका क्रममा मृत्यु भएको प्रहरीले जनाएको छ।

ट्याङकर चालक सिरहाको कर्जन्हा नगरपालिका–३ का मिथलेश यादव घाइते छन्। उनको कन्चनरुप स्थित धर्मेश्वर अस्पताल ठेलियामा उपचार भइरहेको प्रहरीले जनाएको छ।