ओभरस्पिड स्कारपियो विजुलीको पोलमा ठोक्किएर दुर्घटना, चालकसहित ४ जना घाईते
शीर्ष खबर 
काठमाडौँ– पूर्वपश्चिम राजमार्ग अन्तर्गत मकवानपुरको मनहरी गाउँपालिका–९, खरङ्गामा आज बिहान स्कार्पिओ दुर्घटना हुँदा चारजना घाइते भएका छन्।
बिहान करिव साढे ५ बजे बाराको निजगढबाट चितवनतर्फ जाँदै गरेको प्रदेश ३–०१–२२ च ६८६२ नम्बरको स्कार्पिओ अनियन्त्रित भई सडकको बायाँतर्फ रहेको विद्युतको पोलमा ठोक्किएर दुर्घटना भएको हो। गाडी पोलमा ठोक्किएर सडकबाट झण्डै ५० मिटर तल खसेको छ।
मकवानपुर प्रहरीका अनुसार दुर्घटनामा गाडी चालक ४५ वर्षीय धनबहादुर स्याङतान, उनकी श्रीमती ३८ वर्षीय हरिमाया लामा, छोरा १३ वर्षीय यरोश तामाङ र सोही स्थानका ३३ वर्षीय सबु लामा घाइते भएका छन्।
घाइतेहरूको टाउको, अनुहार र छातीमा चोट लागेको छ। उनीहरुलाई तत्काल उद्धार गरी मनहरी अस्पताल पुर्याइएको थियो। त्यहाँ प्राथमिक उपचारपछि उनीहरूलाई थप उपचारका लागि भरतपुर, चितवन पठाइएको मकवानपुर प्रहरीका डीएसपी श्यामु अर्यालले जानकारी दिए।
तीव्र गतिका कारण गाडी अनियन्त्रित भई विद्युतको पोलमा ठोक्किएको हुनसक्ने प्रहरीको अनुमान छ।
