काठमाडौँ– अख्तियार दुरुपयोग अनुसन्धान आयोगका प्रमुख आयुक्त प्रेमकुमार राईलाई ज्यान मार्ने धम्की आएको खुलासा भएको छ। आफूलाई ‘एक्स्ट्रिमिस्ट ग्रुप अफ नेपाल’ भन्ने समूहले राईलाई खुलेआम हत्याको धम्की दिएको हो।

संवैधानिक आयोग (अख्तियार) को आधिकारिक इमेलमा पठाइएको उक्त धम्कीले त्रासको स्थिती सृजना गरेको छ। उक्त समूहले राईलाई १० दिनभित्र राजीनामा दिन चेतावनी दिँदै नभए हत्या गर्ने योजना बनाएको दाबी गरेको छ। हत्याको लिष्टमा उनि जस्ता अन्य ९ जनाको नाम उल्लेख रहेको जनाईएको छ। इमलेमा भनिएको छ, ‘हामीले १० जनाको हत्या गर्ने निर्णय गरेका छौँ, त्यसमा तपाईंको नाम पनि समावेश छ। १० दिनभित्र राजीनामा दिनुहोस्, नत्र आफ्नो अन्तिम इच्छा पूरा गर्न सक्नुहुन्छ।’

धम्कीपूर्ण इमेलमा भदौ २४ गते विभिन्न कारागारबाट भागेका कैदीबन्दीलाई ‘हत्यामा परिचालित गर्ने’ घोषणा गरिएको छ। आफूलाई ‘संगठन प्रमुख’ बताउने प्रकाश पाठकको नाममा पठाइएको इमेलमा लेखिएको छ, ‘यो काम भागेका कैदीहरुले गर्नेछन्, हामी आर्थिक सहायता मात्र गर्नेछौँ, घटनाको जिम्मेवारी भने हामी नै लिनेछौँ।’

यस घटनाले मुलुकको संवैधानिक निकायकै शीर्ष पदाधिकारीलाई लक्षित गरेरे ‘आतंकवादी आतंक’ फैलाएको देखिएको छ। तर, प्रहरी अनुसन्धान भने भिन्न दिशामा छ। प्रारम्भिक अनुसन्धानमा यो सबै गतिविधिको डोरी नेपाल नागरिक उड्डयन प्राधिकरण (क्यान)का महानिर्देशक प्रदीप अधिकारीतर्फ तानिएको प्रहरी स्रोतले बताएको छ।

अनुसन्धानमा संलग्न एक प्रहरी अधिकृतलाई उधृत गर्दै जनआस्था डटकमले लेखेको छ–‘धम्की पठाउने समूहको पहिचान भइसकेको छ र उनीहरूको लोकेशन ट्रयाक भइरहेको छ। यो सबै काम महानिर्देशक अधिकारीकै निर्देशनमा गरिएको जस्तो संकेतहरू देखिएका छन्। तर, पूर्ण पुष्टि प्रक्रिया जारी छ।’

महानिर्देशक अधिकारीले यसअघि पनि ‘जेनजी’ आन्दोलनका युवालाई उचालेर आफ्नो प्रतिकूल व्यक्तिलाई धम्क्याउने प्रयास गरेको आरोपमा विवादमा तानिएका थिए। अख्तियार प्रमुखलाई लक्षित यस्तो गम्भीर धम्कीपछि सुरक्षा व्यवस्था कडा बनाइएको जनाइएको छ।