चितवन — चुनावी माहोल चर्किंदै जाँदा राजनीतिक आरोप–प्रत्यारोप पनि झन् आक्रामक बन्दै गएको छ। यहीबीच नेपाली कांग्रेसका उपसभापति विश्वप्रकाश शर्माले प्रधानमन्त्रीको दौडमा देखिएका दुई चर्चित अनुहार—केपी शर्मा ओली र राष्ट्रिय स्वतन्त्र पार्टी (रास्वपा) का वरिष्ठ नेता बालेन्द्र साह दुवैलाई एउटै वाक्यमा अस्वीकार गर्दै राजनीतिक तरंग पैदा गरेका छन्।

उनले दुवै नेताको शैली र स्वभावमाथि सिधै प्रहार गर्दै देश हाँक्ने जिम्मेवारी उनीहरूबाट सम्भव नहुने दाबी गरेका छन्। सोमबार चितवनमा आयोजित चुनावी कार्यक्रममा बोल्दै शर्माले ओलीलाई ‘बोलेको बोलेई, घोचेको घोचेई गर्ने’ नेता भन्दै कटाक्ष गरे भने बालेन्द्रलाई ‘बोल्दै नबोल्ने’ चरित्रको रूपमा चित्रण गरे। उनको तर्क थियो— ‘अत्यधिक बोल्ने र पूर्ण मौन बस्ने दुवै चरित्रले राज्य सञ्चालन गर्न सक्दैन। देशलाई सन्तुलित, जिम्मेवार र नापतौल गरेर बोल्ने नेतृत्व चाहिन्छ, न कि आवेग र आवरणमा चल्ने नेतृत्व।’

उनको भाषणमा ओलीप्रति व्यंग्य र बालेनप्रति संकेतात्मक आलोचना स्पष्ट सुनिन्थ्यो। ‘एउटा धेरै बोल्ने, अर्को बोल्दाबोल्दै हराउने,’ भन्दै उनले दुवै शैलीलाई असफल नेतृत्वको संकेतका रूपमा व्याख्या गरे। ‘देशको प्रधानमन्त्री धेरै बोल्नेबाट पनि चल्दैन, बोल्दै नबोल्नेबाट पनि चल्दैन,’ भन्दै उनले नेतृत्व क्षमताको मूल आधार विवेक र सन्तुलन हुनुपर्ने जिकिर गरे।

शर्माले यही प्रसंगलाई जोड्दै कांग्रेस सभापति गगन थापालाई वैकल्पिक अनुहारका रूपमा अघि सारे। उनले थापालाई ‘तौलेर बोल्ने’ र अन्तर्राष्ट्रिय मञ्चमा समेत नेपाललाई प्रतिनिधित्व गर्न सक्ने सक्षम नेता भएको दाबी गरे। उनका अनुसार प्रधानमन्त्री केवल आन्तरिक राजनीति गर्ने व्यक्ति होइन, विश्वसँग संवाद गर्न सक्ने, कूटनीति बुझ्ने र नेपालको छवि निर्माण गर्न सक्ने व्यक्तित्व हुनुपर्छ।

उनले प्रश्न गरे, ‘नेपालको प्रधानमन्त्री चयन भइसकेपछि फ्रान्स वा संयुक्त राष्ट्रसंघमा नेपालबारे सोधिँदा स्पष्ट रूपमा देशको धारणा राख्न सक्ने नेतृत्व चाहिन्छ कि केवल लोकप्रिय नारामा सीमित हुने?’ यस टिप्पणीमार्फत उनले प्रधानमन्त्री पदलाई स्थानीय तहको शैलीसँग तुलना गर्न नहुने संकेत गरे।

शर्माले झोक र आवेगको राजनीतिमाथि पनि कटाक्ष गरे। ‘झोक चल्यो भने घर जलाइदिन्छु भन्ने भाषा प्रधानमन्त्रीका लागि उपयुक्त हुँदैन,’ भन्दै उनले भावनात्मक उक्साहट र आक्रामक अभिव्यक्ति राज्य नेतृत्वका लागि खतरनाक हुने चेतावनी दिए। अप्रत्यक्ष रूपमा बालेन्द्र साहको विगतका अभिव्यक्तिप्रति लक्षित यो टिप्पणीले चुनावी बहसलाई अझ तताएको छ।

उनले जेनजी आन्दोलनको प्रसंग पनि उठाउँदै सरकारमा रहँदा पार्टीबाट भएका कमजोरीको जिम्मा लिन कांग्रेस तयार रहेको बताए। यसले आफूहरू आत्मालोचनामा पनि तयार रहेको सन्देश दिन खोजेको देखिन्छ। तर भाषणको मुख्य केन्द्र भने ओली र बालेन दुवैलाई ‘प्रधानमन्त्रीका लागि अनुपयुक्त’ ठहर गर्नु नै थियो।