रौतहट– रौतहटको दुर्गाभगवती गाउँपालिका–४ स्थित गौर–गंगापिपरा सडकखण्डमा आइतबार बिहान भएको भीषण मोटरसाइकल दुर्घटनामा एक दम्पतीको ज्यान गएको छ।

बिहान करिब साढे पाँच बजे गंगापिपराबाट गौरतर्फ आउँदै गरेको भारतीय नम्बर प्लेट बीआर३०यू १३७१ नम्बरको मोटरसाइकल झाझपुल नजिकै अनियन्त्रित भई सडकबाट करिब ५० मिटर तल खसेर सिसौको रुखमा ठोक्किएको प्रहरीले जनाएको छ।

दुर्घटनामा मोटरसाइकल चालक यमुनामाई गाउँपालिका–४ सरुअठा निवासी २४ वर्षीय जितेन्द्र साह र उनकी श्रीमती २२ वर्षीया पुनमदेवी साह गम्भीर घाइते भएका थिए। दुर्घटनापछि दुवै जना टाउको, मुख तथा शरीरका विभिन्न भागमा गम्भीर चोट लागेर अचेत अवस्थामा फेला परेका थिए। स्थानीयको सहयोगमा तत्काल उद्धार गरी प्रादेशिक अस्पताल गौर पठाइएको थियो।

जिल्ला प्रहरी कार्यालय रौतहटका डीएसपी विष्णु प्रदीप बस्यालका अनुसार अस्पतालमा उपचारका क्रममा दुवै जनाको मृत्यु भएको हो। प्रारम्भिक अनुसन्धानमा मोटरसाइकल आफैं अनियन्त्रित भएर दुर्घटना भएको देखिएको छ, यद्यपि दुर्घटनाको यथार्थ कारणबारे थप अनुसन्धान भइरहेको प्रहरीले जनाएको छ।

सडकको अवस्था, सवारीको गति वा अन्य प्राविधिक कारणमध्ये के कारणले दुर्घटना भयो भन्ने विषयमा प्रहरीले विस्तृत छानबिन थालेको छ। युवा दम्पतीको असामयिक मृत्युले परिवार र गाउँमा शोकको वातावरण छाएको छ।