क्याम्पस प्रमुख हत्या प्रकरणः प्रहरीको खेलाँचीले हत्या, प्रहरीकै कमजोरीले फरार भए योजनाकार

जनकपुर– बाराको कलैयास्थित रामराजा मोहनविक्रम शाह बहुमुखी क्याम्पसका प्रमुख हरिभूषण कुशवाहाको हत्याका मुख्य आरोपित सुरेन्द्र कुशवाहा प्रहरीकै कमजोरीका कारण भाग्न सफल भएको खुलेको छ।

त्यसमा पनि एसपी महेन्द्र खड्काले घट्नाको संवेदनशिलतालाई ख्याल नगर्दा सुरेन्द्र फरार भएको स्रोतको दावी छ। हरिभुषणलाई क्याम्पसबाट फर्कंदै गर्दा गत ३२ जेठको साँझ आदर्शकोतवाल गाउँपालिका–३, बतरामा पछाडिबाट पिठ्युँमा गोली हानिएको थियो। गोली हान्न मोटरसाइकलमा २ जना आएका थिए। तत्कालै बयोधा अस्पताल वीरगञ्जमा भर्ना गरिएका हरिभुषणको उपचारकै क्रममा ज्यान गएका थियो।

प्रहरीले हालसम्म घट्नामा संलग्न मध्ये ७ जनालाई पक्राउ गरेको छ। आदर्श कोतवाल गाउँपालिका–२ खजुरियाका अवधलालप्रसाद कुशवाहा, चाँदसीप्रसाद कुशवाहा, राधेशकुमार पटेल, विनोद राउत कुर्मी, कलैया उपमहानगरपालिका–१०, मटिअर्वाका ब्रहमदेव राम (आम्रपाली), करैयामाई गाउँपालिका–७, पिपराका मोतिलाल चौधरी र बारागढी गाउँपालिका–५, पथराका हरिन्दर महरा चमार पक्राउ परेका छन्।

उनीहरूको साथबाट २ थान पेस्तोल, एक थान म्यागजिन, ६ राउन्ड गोली, तीनवटा मोटरसाइकल, विभिन्न मोबाइल, ल्यापटप र नेपाली तथा भारतीय सीम कार्ड प्रहरीले बरामद गरेको छ। तर, घट्नाका योजनाकार तथा मुख्य आरोपित भनिएका सुरेन्द्र अझै पक्राउ परेका छैनन्। नेपाली सेनाका भगौडा सैनिकसमेत रहेका उनी भारतीय क्षेत्रमा लुकेर वसेको प्रहरीले जनाएको छ।

जानकारी अनुसार गोली लाग्नासाथ हरिभुषणले एसपी खड्कालाई फोन गरेर घट्नाको बारेमा जानकारी गराएका थिए। सुरेन्द्रले आफूलाई गोली हानेको भन्दै उनले एसपी खड्कासँग गरेको भीडीओ सम्वाद प्रहरीले सुरक्षित राखेको छ। तर, सूचना संयन्त्र कमजोर हुँदा सुरेन्द्र भाग्न सफल भएको स्रोतको दावी छ।

यता, सुरेन्द्रलाई पक्राउ गर्न बारा प्रहरीका एसपी खड्का आफैं पटनासम्म पुगेका थिए। तर, प्रहरीले पिछा गरेको सूचना पाएपछि भारतीय प्रहरीलाई प्रभावमा पारेर सुरेन्द्र त्यहाँबाट पनि फरार भएको जनाईएको छ।

प्रहरीका अनुसार हरिभूषण कलैया र आदर्श कोतवाल गाउँपालिका–२ खजुरिया दुवै ठाउँका स्थानीयवासी हुन। दुवै ठाउँमा उनको घर छ। उनी गाउँका जमिन्दार पनि हुन। खजुरियामा माछापालन गर्दै आएका उनी ८ वर्षअघि क्याम्पस प्रमुखमा नियुक्त भएका थिए। त्यसैले कलैया र खजुरिया ओहोरदोहार गरिरहन्थे।

जानकारहरूका अनुसार सुरेन्द्र र हरिभूषण केही समय अघिसम्मका व्यवसायीक र राजनीतिक पार्टनर हुन। सुरेन्द्र ०७४ को स्थानीय तह निर्वाचनमा उपेन्द्र यादव नेतृत्वको जसपाबाट आदर्श कोतवाल गाउँपालिका–२ को वडाध्यक्षका उम्मेदवार थिए। निर्वाचनको अधिकांश खर्च हरिभुषणले गरे। तर, एमाले उम्मेदवारले चुनाव जितेपछि सुरेन्द्र चुनाव हारे।

विगत ६ महिना यता भने उनिहरुको बीचमा दुस्मनी सुरु भएको थियो। यसको पछाडिको कारण अवैध सम्पत्ति आर्जन र राजनीति दुवै जोडिएको सुरक्षा स्रोत बताउँछ। खासगरी, हरिभूषणले सुरेन्द्रका भाइलाई दिएको ठेक्कामा सहमति भन्दा २ लाख रुपैयाँ कम दिएपछि सुरेन्द्र हरिभूषणसँग रिसाएका थिए। त्यसैबेलादेखि उनीहरूबीच मनमुटाव शुरू भएको थियो।

यसैगरी, सुरेन्द्रसँग लुकाएर हरिभूषणले ४÷५ ठाउँमा जग्गासमेत किनेका थिए। यो विषयले पनि सुरेन्द्र हरिभुषणसँग रुष्ट थिए। त्यसपछि सुरेन्द्रले हरिभुषणलाई ठेगान लगाउन योजनावद्ध रुपमा काम गरेको देखिएको छ।

गाउँमा गाइभैंसी फार्म खोल्ने भनेर टहरो बनाई केही भैंसीसमेत पालेका सुरेन्द्रले हरिभूषणको हत्या योजना बनाएपछि भएका भैंसी पनि वेचिसकेको र आफ्नो परिवारलाईसमेत अन्यत्र सारिसकेको खुलेको छ। यसको जानकारी हरिभुषणलाई पनि थियो। उनले घटना हुनुभन्दा एक महिनाअघि नै आफू असुरक्षित भएको भन्दै प्रहरीसँग सुरक्षा मागेका थिए।

तर, प्रहरीले उनको कुरालाई गम्भिरता पूर्वक नलिँदा घट्ना भएको पाईएको छ। बारा प्रहरीका डीएसपी दधिराम न्यौपानेले मुख्य अभियुक्त सुरेन्द्रको खोजी भइरहेको बताएका छन्। उनी पक्राउ परेपछि थप रहस्य खुल्दै जाने उनको विश्वास छ।


प्रतिक्रिया

Leave a Reply

Your email address will not be published. Required fields are marked *

लोकप्रिय

ताजा अपडेट