वीरगन्ज — खानेपानी मन्त्री प्रदीप यादव र वीरगन्ज महानगरपालिकाका मेयर राजेशमान सिंहलाई फोनमार्फत धम्की दिएको आरोपमा एक टिकटकर युवती पक्राउ परेकी छिन्।

पर्सा प्रहरीले वीरगन्ज महानगरपालिका–२४, रामगढ निवासी टिकटकर किरण साहलाई पक्राउ गरेको हो। जिल्ला प्रहरी कार्यालय पर्साका डीएसपी किशोर लम्सालका अनुसार साहले मन्त्री यादव र मेयर सिंहलाई फोन गरेर धम्की दिएको गुनासो दुवै जनाबाट आएको थियो।

लम्सालले भने, ‘मन्त्रीज्यू र मेयरज्यूबाट मौखिक गुनासो आएपछि प्रारम्भिक सोधपुछका लागि युवतीलाई नियन्त्रणमा लिइएको हो।’

प्रहरीका अनुसार हैजाको प्रकोपले वीरगन्जमा गम्भीर अवस्था सिर्जना भएको छ। किरण साहका पिता र परिवारका अन्य सदस्यहरू समेत गम्भीर बिरामी भई अस्पतालको सघन उपचार कक्ष (आईसीयू) मा भर्ना छन्। यही पीडाबाट आक्रोशित भइ उनले मन्त्री र मेयरलाई फोन गरेर अभद्र शब्द प्रयोग गर्दै धम्की दिएको खुलेको छ।

सो घटनासँग सम्बन्धित अडियो क्लिप शुक्रबारदेखि सामाजिक सञ्जाल फेसबुकमा भाइरल भएको छ। प्रहरीको भनाइ अनुसार अहिले साहलाई आवश्यक अनुसन्धानका लागि नियन्त्रणमा राखिएको छ र थप कानूनी प्रक्रिया अघि बढाइनेछ।