सप्तरी मालपोत कार्यालयभित्रै बिचौलियाको ‘दरबार’, डोजर लगाएर भत्काइयो अतिक्रमित टहरा !
राजविराज– सर्वसाधारणले सरकारी सेवा लिनुपर्ने मालपोत कार्यालयको हाताभित्रै बिचौलियाको संरचना खडा भएको थियो। सेवाग्राहीको भीड लाग्ने कार्यालय परिसरमै लेखापढी व्यवसायीले अतिक्रमण गरेर घर तथा टहरा बनाएका थिए। आइतबार साँझ प्रशासनले डोजर लगाएर ती संरचना भत्काएको छ।
राजविराजस्थित भूमि प्रशासन कार्यालय (मालपोत) को हाताभित्र निर्माण गरिएका अतिक्रमित संरचना सप्तरीका सीडीओ श्यामकृष्ण थापाको उपस्थितिमा हटाइएको हो। राजविराज नगरपालिकाका नगरप्रहरी र एक्स्काभेट (डोजर) परिचालन गरी लेखापढी व्यवसायीले बनाएका घर तथा टहरा भत्काइएको प्रशासनले जनाएको छ।
सरकारी कार्यालयको हाताभित्रै निजी संरचना बनाएर व्यवसाय सञ्चालन भइरहेको अवस्थाले मालपोत कार्यालयमा बिचौलियाको पहुँच र प्रभावबारे प्रश्न उठाउँदै आएको थियो। सेवाग्राहीले सरकारी सेवा लिन कार्यालय पुग्दा परिसरभित्रै लेखापढी व्यवसायीका संरचना भेटिनु र उनीहरूको पहुँच रहनुले कार्यालयको सेवा प्रवाह कति व्यवस्थित छ भन्ने प्रश्नसमेत जन्माएको थियो।
सीडीओ थापाले संरचना हटाइएपछि कार्यालयभित्र हुने बिचौलियाको पहुँच बन्द हुने अपेक्षा गरिएको बताए। प्रशासनको बुझाइमा कार्यालय परिसरबाटै निजी संरचना हटाउँदा सेवाग्राही र कर्मचारीबीच अनधिकृत पहुँचको सम्भावना कम हुनेछ।
तर एक्स्काभेट लगाएर टहरा भत्काउनु मात्रै बिचौलियाको प्रभाव अन्त्य हुने ग्यारेन्टी होइन। कार्यालयभित्र हुने अनावश्यक दौडधुप, सेवाग्राहीलाई पार्ने दबाब र काम छिटो गराइदिने नाममा हुने चलखेल नियन्त्रण गर्न कार्यालय प्रशासनको नियमित निगरानी पनि आवश्यक हुन्छ। संरचना हटेपछि सेवाग्राहीले बिचौलियाको सहारा नलिई सहज रूपमा सेवा पाउने वातावरण बनाउनु अब मालपोत प्रशासनको चुनौती हुनेछ।
यसैबीच राजविराज नगरपालिकाले नगर क्षेत्रका सार्वजनिक फुटपाथमा भएको अतिक्रमण हटाउने अभियानलाई पनि निरन्तरता दिएको छ। अड्डा लाइनसहित नगरका विभिन्न स्थानमा अतिक्रमण गरी ओगटिएका फुटपाथ खाली गराउने काम भइरहेको नगरपालिकाले जनाएको छ।
कार्यवाहक नगरप्रमुख इसरत परविनका अनुसार फुटपाथ खाली गराउन पटकपटक सूचना जारी गरिए पनि त्यसको बेवास्ता भएपछि नगरप्रहरी र एक्स्काभेटर परिचालन गर्नुपरेको हो। सार्वजनिक पैदलमार्ग अतिक्रमण हुँदा पैदलयात्रुलाई आवागमनमा समस्या पर्ने भएकाले खाली गराउने अभियान अघि बढाइएको उनले बताइन्।
मालपोत कार्यालयभित्रै बनेका संरचना हटाउनु र नगरका फुटपाथ खाली गराउनु राजविराजमा सार्वजनिक तथा सरकारी स्थानमाथिको अतिक्रमण हटाउने अभियानका हिस्सा हुन्। तर सरकारी कार्यालयको परिसरमा वर्षौंदेखि कायम रहेको बिचौलियाको पहुँच र नगरका सार्वजनिक स्थानमा हुने अतिक्रमणलाई स्थायी रूपमा नियन्त्रण गर्न एक्स्काभेटर अभियानसँगै प्रभावकारी व्यवस्थापन र निरन्तर अनुगमन आवश्यक छ।
मालपोत कार्यालयको हाताभित्र बनेका टहरा भत्किएका छन्। अब प्रश्न ती संरचना फेरि बन्न नदिने र सेवाग्राहीलाई बिचौलियाको प्रभावबाट मुक्त राख्ने जिम्मेवारी प्रशासनले कसरी पूरा गर्छ भन्ने हो।

