सप्तरीको गोबरगाढामा भारतीय सुरक्षाकर्मीको आतंकः नागरिकको घरमा खानतलासी, जनप्रतिनिधिलाई गाली
शीर्ष खबर 
राजविराज— सप्तरीको हनुमाननगर कंकालिनी नगरपालिका–१३, गोबरगाढा टापुमा भारतीय सुरक्षाकर्मीले अनाधिकृत रुपमा प्रवेश गरी आतंक सृजना गरेका छन्। उनीहरुले गोवरगाढा भारतीय भुमी भएको दावी गर्दै स्थानीयको घर खानतलासी गर्नेदेखि जनप्रतिनिधिलाई गालीगलौज गर्नेसम्मका उपद्रो गरिरहेका छन्।
वडाध्यक्ष कुशेश्वर यादवका अनुसार भारतीय सीमा सुरक्षा बल (एसएसबी)का जवान तथा रतनपुरा थानाका दरोगासहितको प्रहरी टोली गत आईतबारदेखि गोबरगाढामा आउजाउ गरिरहेका छन्। डुंगा चढेर सप्तकोशी नदीको भंगालो तरेर आउने घर खानतलासीका नाममा नागरिकलाई दुःख दिने र गाली गलौज गर्ने गरका छन्।
जनप्रतिनिधिले उनीहरुलाई सम्झाउन खोज्दा उल्टै अभद्र ब्यवहार गर्ने गरेको वडाध्यक्ष यादवको भनाई छ। वस्तीमा विवाद भएपछि मिलाउन जाँदा भारतीय सुरक्षाकर्मीसँग भेट भएको र आफुलाई समेत गाली गरेको उनले वताए।
आइतबारपछि उनीहरु पटक–पटक आएर स्थानीयलाई लखेट्ने शैलीमा धम्की दिएर जाने गरेको यादवको गुनासो छ। उनीहरुमा नेपाली भूमि कब्जा गर्ने नियत देखिएको भन्दै त्यस वारेमा आफूले सशस्त्र प्रहरीलाई पनि जानकारी गराइसकेको बताए।
हनुमाननगर कंकालिनी नगरपालिकाका मेयर वीरेन्द्र माझीले नेपाली भूमिमा भारतीय सुरक्षाकर्मीहरु आएर जबरजस्ती गर्न खोज्नु निन्दनीय भएको बताए। सशस्त्र प्रहरी बल गण नम्बर ६ का सशस्त्र प्रहरीका एसपी ज्ञानमणि पौडेलले नेपाली भूमिमा भारतीय सुरक्षाकर्मी आएर गालीगलौज गरेको कुरा वडाध्यक्षबाट जानकारी पाएको बताए।
अहिले कोशीको भंगालो तरेर जान सक्ने अवस्था नरहेकाले सुरक्षाकर्मीलाई पठाएर आवश्यक ब्यवस्थापन गर्ने उनको भनाई छ। कोसी नदीको बीचमा ‘टापु’ को गाउँ भनेर चिनिने गोबरगाढा सप्तरीको अतिविकट ठाउँ हो।
चारैतिर कोसी नदीले घेरिएका कारण यहाँ आवतजावत गर्न त्यति सहज छैन। सदरमुकाम राजविराजबाट करिव १५ किलोमिटरको दुरीमा रहे पनि ‘राज्यविहीनता’ को अवस्था छ।
