बुबा गुमाएको तीन महिना पुगेकै दिन डडेलधुराकी २१ वर्षीया टिकटकरले देह त्यागिन
शीर्ष खबर 
काठमाण्डौं– श्रीमान् गुमाएको तीन महिना नपुग्दै २१ वर्षीया छोरी पनि गुमाउनु पर्दा डडेल्धुराको गन्यापधुरा गाउँपालिका–३ की ५५ वर्षीया लक्ष्मीदेवी देउवालाई बज्रपात परेको छ। ब्लड प्रेसरका बिरामी उनका पति वितेको २६ भदौमा ३ महिना पुगेको छ।
सोही दिन (२६ भदौ) मा कान्छी छोरी २१ वर्षीया विमलाले पनि आत्महत्या गरेपछि लक्ष्मीले संसार उजाडिएको महसुस गरिरहेकी छिन्। स्थानीयका अनुसार डडेल्धुरा सदरमुकामस्थित डडेलधुरास्थित महेन्द्र नमुना माध्यमिक विद्यालयबाट कक्षा १२ को परिक्षा दिएकी उनी रिजल्ट बिग्रिएको तनावमा थिइन्।
सदरमुकामबाट फर्किएपछि केही दिनअघि आमासँग ‘मरिदिन्छु नी’ समेत भनेको खुलेको छ। परिवारको कुरा सुुन्दा रिजल्ट बिग्रिएकै कारण उनले मृत्युको बाटो रोजेको जस्तो देखिएको वडाध्यक्षसमेत रहेका छिमेकी चक्र देउवा बताउँछन्। उनका अनुसार विमलाको स्वभाव राम्रै थियो। उनले यस्तो बाटो रोज्लिन भनेर कसैले कल्पना नै नगरेको उनको भनाई छ।
परिवारले आउँदो मंसिरमा उनको बिहे गर्ने तयारी गरिरहेको थियो। तर, उनी आफ्नै कोठामा झुन्डिएको अवस्थामा फेला परिन्। लक्ष्मीका जेठा छोरा बुवाको किरिया सकेर रोजगारीका लागि भारतमा छन्। घरमा लक्ष्मीसहित विमला, बुहारी र ससाना तीन जना नातिनातिना बस्थे।
घट्ना भएको दिन खाना खाएर लक्ष्मी बाख्रा चराउन र वुहारी घाँस काट्न गए। विमला घरमै थिइन्। बेलुका सबै घर फर्किएपछि विमलाको खोजी भयो। केटाकेटीलाई हेर्न पठाउँदा कोठामा उनी झुण्डिएको अवस्थामा फेला परिन।
विमला सामाजिक सञ्जाल टिकटकमा सक्रिय रहेको पाईएको छ। टिकटकमा उनका २ लाख २४ हजार फलोअर्स छन्। जिल्ला प्रहरी कार्यालय डडेल्धुराका डीएसपी दीपक कार्कीका अनुसार आत्महत्याको कारण खुलेको छैन।
