काठमाडौँ — भारतको नयाँ दिल्लीमा पक्राउ परेका बागलुङको ढोरपाटन नगरपालिकाका मेयर ५१ वर्षीय देवकुमार नेपालीलाई प्रहरीले नेपाल ल्याएर बागलुङ पठाएको छ। करिब डेढ वर्षदेखि फरार रहेका नेपालीलाई प्रहरीले इन्टरपोलको समन्वयमा शुक्रबार नयाँ दिल्लीबाट पक्राउ गरेको थियो।

सहकारी बचतकर्ताको सवा अर्ब अपचलन गरेको अभियोग लागेका नेपालीलाई विमानबाट ल्याएर बागलुङ पठाइएको हो।

पोखरा र बागलुङमा सञ्चालित ईमेज बचत तथा ऋण सहकारी संस्थाको संस्थापक अध्यक्ष तथा पोखरामा सञ्चालित सुर्यदर्शन बचत तथा ऋण सहकारी संस्थाको संचालक समिति उपाध्यक्ष रही सहकारीको १ अर्ब ३८ करोड ६३ लाख १३ हजार ५२५ रुपैयाँ अपचलन गरेको आरोप उनीमाथि छ ।

नेपाल प्रहरीको केन्द्रीय अनुसन्धान ब्युरो (सीआईबी) का प्रवक्ता एसपी होबिन्द्र बोगटीका अनुसार सोही प्रकरणमा मेयर नेपालीसँगै बागलुङको बुर्तिबाङका ५८ वर्षीय ओमप्रसाद दर्जीलाई समेत पक्राउ गरी बागलुङ पठाइएको हो।

नेपाली ०७९ को निर्वाचनमा ढोरपाटनको मेयर बनेका थिए। सहकारीको अध्यक्षका रुपमा बचत रकम अपचलन गरेको खुलेपछि उनीविरुद्ध बचतकर्ताले उजुरी दिएका थिए। उक्त सहकारीले ७ वैशाख ०८० मा अकस्मात कारोबार बन्द गरेको थियो।

कारोवार वन्द भएको सूचना टाँसेर सम्पर्कविहिन भएका नेपालीसँगै उनकी श्रीमती पनि सम्पर्कविहीन छिन्।