काठमाडौँ– दाङको नवयुग डान्स क्लबबाट भ्रमण टोली बोकेर पोखरा पुगेको बस दुर्घटना हुँदा दुई जना घाइते भएका छन्।

बिहीबार पोखरा महानगरपालिका– २२, विश्व शान्तिस्तूप नजिकै रा १ ख २१०६ नम्बरको बस दुर्घटना भएको हो। पुम्दीकोटबाट पोखरा झर्दै गर्दा बस दुर्घटनामा परेको हो।

जिल्ला प्रहरी कार्यालय कास्कीका डिएसपी बसन्तकुमार शर्माका अनुसार बसमा २४ जना सवार थिए। ती मध्ये २ जना घाइते भएका हुन्। दाङको तुल्सीपुर उपमहानगरपालिका– ४ की सन्ध्या रसाईली (१७) र मनिषा रसाईली (१९) घाईते भएको डीएसपी शर्माले जानकारी दिए।

दुवैको नमस्ते अस्पताल विरौटामा उपचार भइरहेको छ। चालकले नियन्त्रण गुमाउँदा बस दुर्घटना भएको प्रहरीले जनाएको छ।