इटहरी — सुनसरीको इटहरीमा टिपर र म्याजिक भ्यानको अस्वस्थ प्रतिशपर्धाको शिकार संखुवासभाका एक दम्पत्ति भएका छन्।

टिपर र म्याजिक भ्यानको प्रतिस्पर्धामा बीचमा मोटरसाईकल चेपिएर धर्मदेवी नगरपालिका–३ का ३२ वर्षीय युवराज गुरुङ र उनकी श्रीमती ३२ वर्षकै टीका गुरुङको मृत्यु भएको छ।

आइतबार दिउँसो करिव १२ बजे इटहरी उपमहानगरपालिका–१६ बालग्राम चोकमा को १ क ३३८८ नम्बरको टिपर र प्रदेश १–०२–००१ ज ३८११ नम्बरको म्याजिक भ्यान ओभरटेक गर्दा पकलीबाट इटहरीतर्फ आउँदै गरेको को ३६ प ५६३७ नम्बरको बुलेट मोटरसाइकल बीचमा चेपिएको थियो।

त्यस क्रममा सुरूमा माटेरसाईकललाई टिपरले ठक्कर दिएको थियो। ठक्करबाट मोटरसाईकल अनियन्त्रित भएपछि दम्पत्ति नै सडकमा लडेका थिए। लडेकै अवस्थामा उनीहरुलाई म्याजिक भ्यानले किचेको सुनसरी प्रहरीले जनाएको छ।

दुर्घटनामा दुवै जना गम्भीर घाइते भएका थिए। उनीहरुलाई उपचारका लागि धरानस्थित वीपी कोइराला स्वास्थ्य विज्ञान प्रतिष्ठान पु¥याउनसाथ मृत्यु भएको प्रहरीले जनाएको छ।

टिपर चालक मोरङको सुन्दरहरैँचा ३ गछियाका ३५ वर्षीय सागर मग्राती र म्याजिक भ्यानका चालक इटहरी १२ खनारका ३९ वर्षीय श्याम बिकलाई इलाका प्रहरी कार्यालय पकलीले नियन्त्रणमा लिएको छ। घटनाबारे थप अनुसन्धान भइरहेको प्रहरीको भनाइ छ।