जनकपुर — रौतहटको गुजरा नगरपालिका–१ का वडाध्यक्ष ५५ वर्षीय रामजीत चौधरी बाघको आक्रमणमा परी घाईते भएका छन्।

स्थानीय राईटोलमा शनिबार बाघको आक्रमणमा परी वडाध्यक्ष चौधरीसहित गुजरा–१ का ६५ वर्षीय बौराही चौधरी पनि घाइते भएका छन्। जिल्ला प्रहरी कार्यालय गौरका डीएसपी दिपककुमार रायका अनुसार बौराही घर नजिक आलुबारीमा पानी लगाउँदै थिए।

त्यसै वेला उनलाई अचानक बाघले आक्रमण गरेको थियो। उनलाई बचाउन वडाध्यक्ष चौधरी पनि गए। उनलाई पनि बाघले झम्टिएर आक्रमण गर्यो। चौधरीको दुवै हातमा र बौराहीको टाउको र दुवै हातमा चोट लागेको छ।

घाइते दुवैलाई चन्द्रपुरस्थित सरकारी अस्पतालमा उपचारपछि थप उपचारका लागि वीरगन्ज पठाइएको प्रहरीले जानकारी दिएको छ। उनीहरुको वीरगन्जस्थित वयोधा अस्पतालमा उपचार भइरहेको छ।

वन कर्मचारीका अनुसार उक्त बाघ घटनास्थल नजिकै तुरतुरे धारा जंगलबाट आएको हो। त्यहाँ बाघको बासस्थान छ।