नेपालको बाटो हुँदै तीन जना पाकिस्तानी आतंकवादी प्रवेश गरेको भन्दै बिहारमा ‘हाईअलर्ट’
शीर्ष खबर 
राजविराज — पाकिस्तानको आतंककारी संगठन जैश–ए–मोहम्मदमा आवद्ध तीन जना आतंकावादी नेपाल हुँदै भारत प्रवेश गरेको सूचनापछि भारतको विहार राज्यमा विहिबार उच्च सतर्कता अपनाईएको छ।
बिहार प्रहरी मुख्यालयका वरिष्ठ अधिकारीहरूका अनुसार आतंकवादी संगठन जैश–ए–मोहम्मदसँग सम्बन्धित तीन जना शङ्कास्पद व्यक्ति नेपाल–भारत सीमा हुँदै बिहार प्रवेश गरेका छन्। प्रहरीले सार्वजनिक गरेको विवरणअनुसार पक्राउ सूचीमा रहेका व्यक्तिहरूमा पाकिस्तानको रावलपिण्डीका हसनैन अली, उमेरकोटका अदिल हुसैन र बहावलपुरका मोहम्मद उस्मान छन्।
इण्डिया टुडेले खुफिया रिपोर्टलाई आधार मानेर प्रकाशित गरेको समाचार अनुसार उनीहरू साउन दोस्रो हप्तामा काठमाडौं पुगेका थिए। गत हप्तामात्र बिहार प्रवेश गरेका हुन्। मुख्यालयले ती व्यक्तिहरूका पासपोर्टसम्बन्धी विवरण सीमावर्ती जिल्लाका प्रहरीलाई पठाएको छ। सुरक्षासम्बन्धी निकायलाई निगरानी बढाउन, सूचना संकलन गर्न र शङ्कास्पद गतिविधि देखिए आवश्यक कारबाही गर्न निर्देशन दिइएको छ।
यसअघि नै बिहारमा ‘अपरेसन सिन्दूर’ तथा यस वर्षै हुने प्रदेशसभा निर्वाचनका कारण सुरक्षा कडा पारिएको थियो। विशेषगरी मधुबनी, सीतामढी, सुपौल, अररिया, पूर्वी चम्पारण र पश्चिम चम्पारणलगायतका सीमावर्ती क्षेत्रमा गस्ती बढाइएको छ।
बिहारसँग करिब ७२९ किलोमिटर लामो खुला सीमा नेपालसँग जोडिएको छ। यही कारणले यो क्षेत्र लामो समयदेखि घुसपैठ र सीमापार गतिविधिका लागि संवेदनशील मानिँदै आएको छ। बिहारका सात वटा जिल्ला प्रत्यक्ष रुपमा खुला सीमासँग जोडिएका छन्, जसले निरन्तर निगरानी र सुरक्षा व्यवस्थापनलाई चुनौतीपूर्ण बनाएको छ।
भारतीय सीमा चीन, पाकिस्तान, बंगलादेश, नेपाल, भुटान, म्यानमार र अफगानिस्तानसँग जोडिएको छ भने समुद्री सीमा श्रीलङ्का, माल्दिभ्स र इन्डोनेसियासँग छ।
