राजविराज– सप्तरीमा एक युवतीको रहस्यमय मृत्यु भएको छ। दुई महिना अघि महादेवा गाउँपालिका–१ (सोनारा टोल) का दिपक यादवसँग विवाह गरेकी २१ वर्षीया दिपाकुमारी यादवको मृत्यु भएपछि माईती पक्षले दहेजकै कारण हत्या भएको आरोप लगाएका छन्।

मृतकका काका भगवती प्रसाद यादवले जिल्ला प्रहरी कार्यालय सप्तरीमा कर्तव्यज्यान मुद्दामा उजुरी दिएका छन्। दिपाका पिता संजिवकुमार यादव रोजगारीका लागि विदेशमा रहेका कारण भगवतीले उजुरी दिएका हुन। उजुरीमा मृतकका पति २५ वर्षीय दिपक यादव र ससुरा ५५ वर्षीय परशुराम यादवलाई विपक्षी बनाइएको छ।

डाकनेश्वरी नगरपालिका–४, भुतहीकी दिपा र दिपकको विवाह २०८२ असार ४ गते भएको थियो। परिवारका सदस्यका अनुसार विवाहको केही दिनदेखि नै दिपाले दहेज नल्याएको भन्दै निरन्तर यातना सहनुपरेको थियो। जाहेरीमा उल्लेख भएअनुसार दिपाका पति दिपक र ससुरा परशुरामले पटक–पटक कुटपिट गर्दै मानसिक तथा शारीरिक यातना दिने गरेका थिए।

दिपाको मृत्यु हुनु अघिल्लो दिन (१४ भदौ) दिउँसो करिब १ बजेतिर दिपक यादवले सासू प्रमिलादेवी यादवलाई फोन गरी ‘तपाईको छोरी घरको काम गर्दिन, सुतेर बस्छे’ भन्दै आरोप लगाएर फोन काटेका थिए। त्यसपछि निरन्तर फोन सम्पर्क गर्दा दिपकले फोन उठाएनन्। ‘केही बेरमै दिपालाई उपचारका लागि गजेन्द्र नारायण सिंह अस्पताल, राजविराज लगिएको खबर आयो’ भगवतीले भने–‘हामी अस्पताल पुग्दा दिपालाई मृत अवस्थामा भेट्यौं।’

परिवारजनका अनुसार, दिपाको शरीरमा चोटपटकका निशान देखिएका छन्। त्यसैले उनको कुटपिट गरेर हत्या गरिएको स्पष्ट आशंका गरिएको छ। ‘यो सामान्य मृत्यु नभई हत्या नै भएको प्रमाण छ,’– भगवती यादवले भने।

उनले प्रहरीमा दिएको उजुरीमा दिपालाई योजनाबद्ध ढंगले हत्या गरी अस्पताल पु¥याइएको दाबी गरिएको छ। साथै शवको पोस्टमार्टम गर्न र घटनाको निष्पक्ष अनुसन्धान गर्न माग गरिएको छ। मृतकका परिवारजनले दहेजप्रथा र घरेलु हिंसाकै कारण दिपाको ज्यान गएको भन्दै दोषीलाई कडा कारबाही गर्न माग गरेका छन्।

जिल्ला प्रहरी कार्यालय सप्तरीले अनुशन्धानका लागि दिपाका पति दिपक यादव र ससुरा परशुराम यादवलाई पक्राउ गरिएको जानकारी दिएको छ। घटनाबारे गम्भीर अनुसन्धान भइरहेको प्रहरीको भनाई छ।