काठमाडौँ— लुम्बिनी प्रदेशसभा सदस्य सरिता पुनको निधन भएको छ। शनिबार बिहान काठमाडौँको त्रिवि शिक्षण अस्पताल महाराजगञ्जस्थित मनमोहन सेन्टरमा उपचारका क्रममा उनले ज्यान गुमाएकी हुन्।

एमाले पोलिटब्यूरो सदस्य तथा रुकुम पूर्वका इन्चार्ज खेममान खड्काले दिएको जानकारीअनुसार पुनले केही दिनअघि शल्यक्रियामार्फत छोरीलाई जन्म दिएकी थिइन्। त्यसपछि स्वास्थ्यमा समस्या देखिएपछि उनलाई थप उपचारका लागि काठमाडौँ ल्याइएको थियो।

काठमाडौँ ल्याइएपछि पुनको दोस्रो शल्यक्रिया गरिएको थियो। चिकित्सकहरुले उनको मुटुमा कृत्रिम ‘भल्भ’ प्रत्यारोपण गरेका थिए। तर शल्यक्रिया सफल हुन नसक्दा उनको निधन भएको खड्काले बताए।

उपचारमा संलग्न चिकित्सकहरुले समेत पुनमाथि एकैपटक दुईवटा जटिल शल्यक्रिया गर्नुपरेको बताएका छन्।

रुकुम पूर्व, तकसेरा निवासी पुन एमालेबाट समानुपातिक निर्वाचन प्रणालीअन्तर्गत लुम्बिनी प्रदेशसभा सदस्य बनेकी थिइन्। प्रदेशसभामा उनी अर्थ, पर्यटन तथा विकास समितिको सदस्यसमेत रहेकी थिइन्।