विराटनगर— धनकुटा बहुमुखी क्याम्पस परिसरमा एक पुरुषको शव फेला परेको छ। आज बिहान करिब साढे ६ बजे धनकुटा नगरपालिका–६ का ४२ वर्षीय रामबहादुर भुजेल झुण्डिएको अवस्थामा मृत फेला परेका हुन्।

धनकुटा प्रहरीले दिएको जानकारीअनुसार भुजेलको शव क्याम्पसको शिक्षक आवास नजिकै रहेको भोगटेको बोटमा झुण्डिएको अवस्थामा देखिएको थियो। बिहानै क्याम्पसका शिक्षकले शव देखेपछि तत्काल प्रहरीलाई खबर गरेका थिए।

प्रहरीको प्रारम्भिक अनुसन्धानअनुसार भुजेल बिहान घरबाट घाँस काट्न जाने भन्दै हिँडेका थिए। तर केही घण्टापछि उनी मृत फेला परे।

शव पोष्टमार्टमका लागि जिल्ला अस्पताल धनकुटामा राखिएको छ। घटनाको कारण खुल्न बाँकी रहेको र यसबारे थप अनुसन्धान भइरहेको प्रहरीले जनाएको छ।