जनकपुर— रौतहटमा मोबाइल चोरेको आरोपमा सामूहिक कुटपिट हुँदा एक दलित युवाको मृत्यु भएको छ। कटहरिया नगरपालिका–४ बहादुरपुरका २८ वर्षीय नसिव बैठाको वीरगञ्जस्थित स्पोर्ट अस्पतालमा उपचारको क्रममा मृत्यु भएको हो।

भाइ दर्शन बैठाका अनुसार नसिवलाई १६ र १७ साउनमा दुई पटक कुटपिट गरिएको थियो। १६ साउनमा कटहरिया बजारको एक खाजा पसलमा स्थानीय ३२ वर्षीय गर्भुदयाल सर्भङ्गले मोबाइल चोरीको आरोप लगाएर अन्य युवासँग मिलेर कुटपिट गरेका थिए।

भोलिपल्ट १७ साउनमा भने गाउँकै सञ्जय यादव, उनका भाइ विजय यादव र बुबा शिवनाथ यादवले आँपको रुखमा उल्टो झुण्ड्याई नसिवलाई निर्घात कुटपिट गरेको परिवारको आरोप छ। ‘मोबाइल चोरी गरेको स्वीकार्न भन्दै बेल्ट, साइकलको चैन र मुक्काले कुटपिट गरियो,’ भाइ दर्शनले दाबी गरे।

घटना भइरहेका बेला स्थानीयले प्रहरीलाई खबर गरेका थिए। प्रहरी आएर उद्धार गरी चौकीमा ल्याए पनि चोरी भएको प्रमाण नपाएपछि नसिवलाई त्यही दिन साँझ छोडिएको इलाका प्रहरी कार्यालय गरुडाका डीएसपी राजन कार्कीले बताए। भोलिपल्ट भने मोबाइल सञ्जय यादवकै घरमा फेला परेको पीडित पक्षको दाबी छ।

कुटपिटको असरले नसिवको स्वास्थ्य बिग्रँदै गयो। पेट र छाती दुख्न थालेको थियो। यसैबीच, घट्नाको चार दिनपछि नसिवका बुबा बाबुलाल बैठाको मृत्यु भयो। बुबाको काजकिरिया सकेपछि नसिवलाई पनि उपचारका लागि भर्ना गरियो। जीवन ज्योति अस्पताल, कटहरिया हस्पिटल, गौर अस्पताल हुँदै वीरगञ्जको नारायणी र स्पोर्ट अस्पतालमा उपचार गराउँदा गराउँदै ११ भदौको विहान उनको मृत्यु भयो।

नसिवका ७ वर्षीय जेठा छोरा विशाल किरिया बसेका छन्। उनको मृत्युले परिवार शोक र आर्थिक संकटमा परेको छ। उनका चार साना छोरा छन् भने वृद्ध आमा–बुबा र श्रीमती गीताले परिवार चलाउँदै आएका थिए।

पीडित परिवारले चारजनाविरुद्ध जाहेरी दिएको छ। प्रहरीले कर्तव्य ज्यान मुद्दा दर्ता गरी गर्भुदयाल सर्भङ्गलाई पक्राउ गरी कारबाही अघि बढाइएको छ। अन्य तीनजनाको खोजी भइरहेको प्रहरीले जनाएको छ।

श्रीमती गीताले श्रीमानमाथि दलित र गरिब भएकै कारण झुटो आरोप लगाएर कुटपिट गरी हत्या गरिएको आरोप लगाइन्। उनले दोषीमाथि कडा कारबाही र राज्यबाट क्षतिपूर्ति पाउनुपर्ने माग गरिन्। ‘गरिब र दलित भएकै कारण मेरो श्रीमानलाई ज्यान मारियो,’ उनले भनिन्, ‘दोषीमाथि न्यायपूर्ण सजाय होस्, म र मेरा चार स–साना बच्चालाई सरकारले संरक्षण र क्षतिपूर्ति उपलब्ध गराओस्।’