काठमाडौँ– रुपन्देहीको राप्ती गाउँपालिका–७ मा पूर्वसांसद गंगा थारुमाथि स्थानीय महिलाको समूहले कुटपिट गरेको खुलासा भएको छ। बाटो तथा जग्गा सिमानासम्बन्धी विवाद समाधानका लागि छलफल चलिरहेको बेला परिस्थिती उत्तेजित बनेपछि थारु आफैँ महिलाको भीडको निशानामा परेकी हुन्।

स्थानीय स्रोतका अनुसार छलफलको बीचमा गंगा थारु एक महिलामाथि आक्रामक ढङ्गले जाइलागेपछि अन्य महिलाहरूले लछारपछार गर्दै कुटपिट गरेका थिए। पूर्वसांसद थारुले घटनाबारे प्रतिक्रिया दिँदै कुटपिटमा माओवादी कार्यकर्ता संलग्न रहेको आरोप लगाएकी छिन्।

उनले भनिन— ‘माओवादी कार्यकर्ताले कुटेका हुन्, सबैलाई चिन्दछु। बाटोको समस्या समाधान गर्न गएकी थिएँ। घुँडामा चोट लागेको छ, मंगलसूत्र लुटेर लगेका छन्।’ उनका अनुसार उनले यसबारे सिसहनिया अस्थायी प्रहरी चौकीमा उजुरी दिएकी छिन्।

थारुले कुटपिट तथा हातपातमा संलग्न व्यक्तिमाथि कानुनी कारबाहीको माग गर्दै मुद्दा दर्ता गर्ने चेतावनीसमेत दिएकी छन्। उनी विगतमा थरुहट पार्टी र एमाले हुँदै हाल राजावादी अभियन्ताका रूपमा सक्रिय रहेकी छिन्।

यसैबीच, अस्थायी प्रहरी चौकी सिसहनियाका वरिष्ठ असई रकमबहादुर खड्काले घटनामा दुवै पक्षबाट ठाडो उजुरी परेको पुष्टि गरेका छन्। उनका अनुसार गंगा थारु र उनका छिमेकी महिलाबीच जग्गा सिमाना तथा बाटोको विवादकै कारण हातहालाहाल भएको प्रारम्भिक अनुसन्धानले देखाएको छ।